“Yüksək kredit faizləri əhalinin xərclərini artırır” - Ekspert

Azərbaycan əhalisinin banklara olan kredit borcu artır. Kredit borcunun artması kreditlər üzrə faiz dərəcəsinin azaldılması məsələsini aktuallaşdırır. 

Sfera.az xəbər verir ki, iqtisadçı-ekspert Natiq Cəfərli kredit faizlərinin azaldılmasının vacib olduğunu bildirib.  

Ekspert qeyd edib ki, 2024-cü ilin oktyabr ayının 1-də bankların kredit portfeli 27 milyard manat olub. “Bu məbləğın 13,5 milyard manata yaxını istehlak-ipoteka kreditləridir”, - deyən N.Cəfərli son bir ildə əhalinin banklara borcunun 10%-dən çox artdığını vurğulayıb: “Son məlumata əsasən, istehlak kreditlərinin milli valyutada orta faiz dərəcəsi müxtəlifdir və hər istiqamət üzrə faizlər yüksəkdir. Kredit kartı vasitəsilə verilən kreditlər orta hesabla 24 %-lə, məişət avadanlıqlarının alınması ilə bağlı olan kreditlər 25%-lə, yaşayış sahəsinin təmiri ilə bağlı olan kreditlər 16%-lə, avtomobil kreditləri 12%-lə və digər istehlak kreditləri isə 20%-lə ayrılır”. 

N.Cəfərli hesab edir ki, belə yüksək faiz dərəcələri vətəndaş üçün əlavə yükdür, dolayı vergiləndirmədir: “Məsələn, 100 manat olan məişət avadanlığını kreditlə satanda qiyməti 125 manata başa gəlir. Kredit faizlərinin yüksək olması əhalinin xərclərini bir qədər də artırır.Əhəli sürətlə borclanır və bunu kefindən etmir, qazancları aşağı düşdükcə, kreditə ehtiyaclar da artır. Heç də təsadüfi deyil ki, son 1 ildə vaxtı keçmiş, problemli istehlak kreditləri 26,6% artıb, bu da dolayısı ilə vətəndaşın gəlirlərinin azalmasına işarədir”. 

Vasif