Neft və qazın ucuzlaşması vergi yığımlarına təsir edib - RƏQƏMLƏR

2024-cü ildə Azərbaycan Dövlət Vergi Xidmətinin (Xidmət) xətti ilə vergi yığımlarında qismən azalma qeydə alınıb.

Sfera.az xəbər verir ki, buna səbəb neft-qaz sektoru üzrə vergi yığımlarında ciddi azalmanın baş verməsidir.

Xidmətin məlumatına əsasən, bu ilin yanvar-oktyabr ayları ərzində 14 milyard 148 milyon manatdan çox vergi toplanıb. Toplanan verginin məbləği ötənilki göstərici ilə müqayisədə 445,5 milyon manat azdır.

Ümumi vergi yığımlarının azalmasına neft-qaz sektorundakı vəziyyət güclü təsir edib. 2024-cü ilin ilk 10 ayı ərzində Xidmətin xətti ilə neft-qaz sektorundan 4,597 milyard manat vergi toplanıb. Ötən il xidmətin xətti ilə neft-qaz sektorundan 6,206 milyard manat vergi toplanmışdı. Bir il əvvəlki dövrlə müqayisədə vergi yığımlarında 1,609 milyard manat, yəni 26 faiz azalma baş verib.

Qeyd edək ki, neft-qaz sektoru üzrə vergi yığımının azalması neft hasilatının azalması, eləcə də neft və qaz qiymətlərinin aşağı düşməsi ilə bağlıdır. Neft-qaz sektoru üzrə vergi yığımlarının azalmasına baxmayaraq, Xidmətin xətti ilə 10 ayı ərzində toplanan vergi proqnozdan 4,4 faiz çoxdur.

Qeyri neft-qaz sektoru üzrə toplanan verginin məbləği isə ötən illə müqayisədə 1,16 milyard manatdan çox artıb. Bu sektor üzrə vergi yığımı 2023-cü ilin yanvar-oktyabr ayları ərzində 8,387 milyard manat olduğu halda, cari ilin eyni dövründə yığımların həcmi 9,55 milyard manatı ötüb. Bir ildə qeyri neft-qaz sahəsi üzrə vergi yığımlarında 14 faizə yaxın artım baş verib.

Ümumilikdə vergilərin 67,5 faizi qeyri-neft-qaz sektorunun, 32,5 faizi isə neft-qaz sektorunun payına düşüb.

Vasif

Sfera.az