Milli valyutada problemli kreditlərin həcmi artıb. Problemli kreditlərin ödənilməsində banklar vətəndaşı həbslə qorxudur. Təcrübə göstərir ki, bu həmişə çıxış yolu olmur.

Bəs qanunvericilikdə krediti ödəməməyə görə həbs mümkündürmü?

Mövzu ilə bağlı Sfera.az-a danışan hüquqşünas Sahib Məmmədov bildirib ki, son zamanlar aldığı krediti qaytara bilməyən insanların sayı çoxalıb.

“Qanunvericiliyə əsasən, təminatlı kreditlərdə girov qoyulan mülk satılır və bankın pulu geri qaytarılır. Təminatsız kreditlərdə isə bir sıra problemlər yaranır. İcra haqqında qanunun tələblərinə uyğun olaraq vətəndaşa 10 gün könüllü müddət verilir. Bundan sonra artıq qanunun 43-cü madəsinə əsasən, məcburi icra tədbirləri həyata keçirilir. Beləliklə, vətəndaşın əmlakı müəyyən olunur, şəxsin krediti qərəzli və ya qərəzsiz ödəməməsi aşkar edilir. Kredit borcu olan şəxsin krediti qərəzli olaraq ödəmədiyi məlum olarsa, həmin şəxsin inzibati məsuliyyətə cəlb edilməsi barədə qərar qəbul edilir. İcra məmurunun təqdimatına məhkəmədə baxılır. Borclu ya məhkəmə qərarı ilə cərimə edilir və yaxud 30 günədək inzibati həbs edilə bilər. Bəzən məhkəmə zallarında razılıq əldə edilir və şəxsə krediti ödəmək üçün vaxt verilir. Məhkəmə qərarlarını qərəzli şəkildə icra etməyən şəxslər isə həbs oluna bilərlər".

Ülkər Abdurahmanlı