Azərbaycan Prezidentinin sərəncamı ilə 2024-cü ilin yanvarın 1-dən pensiyalar növbəti dəfə indeksləşdirilərək artırılacaq. Builki sərəncam da nəzərə alınarsa, son illərdə indeksləşdirmə hesabına pensiyalarda ciddi artıma nail olunub.  

Sfera.az xatırladır ki, Azərbaycanda pensiyalar 2006-cı ildən indeksləşdirilir. 2006-2017-ci illərdə indeksləşdirmə istehlak qiymətləri indeksində baş verən artıma görə, 2018-ci ildən isə orta əməkhaqqında qeydə alınan artım sürətinə uyğun olaraq indeksləşdirilir.

Hesablamalar göstərir ki, 2006-2017-ci illərdə pensiyalarda indeksləşdirmə hesabına artım 117 faiz (2,17 dəfə) olub. 2018-2024-cü illərdə isə pensiyalarda indeksləşdirmə hesabına artım 86,5 faiz təşkil edib. 

Son 7 ildə indeksləşdirmə hesabına pensiyalarda artım sürətinin daha böyük olduğu görünür. Qeyd edilən müddətdə orta əməkhaqqındakı artım qiymətlərdəki artım sürətini xeyli qabaqladığından pensiyaların real dəyəri də yüksəlib. 

Son 7 ildə illik inflyasiya ümumilikdə 61 faiz olub. Əgər pensiyalar illik inflyasiyaya uyğun artırılsa idi, pensiyaların indeksləşdirilməsi 25,5 faiz bəndi az olmalı idi.

Göründüyü kimi, pensiyaların orta əməkhaqqındakı artıma indeksləşdirilməsi daha uğurludur və bu pensiyaçıların gəlirinin daha çox artmasına xidmət edib. 

Vasif