Azərbaycanda dövlət vəsaiti hesabına verilən ipoteka kreditləri üzrə orta məbləğ 61 min manatı ötüb. 

Sfera.az Mərkəzi Banka istinadən xəbər verir ki, 2022-ci ilin sonunda ipoteka kreditləri üzrə orta məbləğ 58 080 manat olduğu halda, 2023-cü ilin dekabrında 61 050 manata yüksəlib. 

İpoteka kreditlərinin məbləğinin artması aylıq ödəniş məbləğinin də artmasına səbəb olub. Müqayisə edilən dövrdə aylıq ödənişin məbləği 410 manatdan 433 manata yüksəlib. 

Qeyd edək ki, 2024-cü ilin əvvəlinə olan məlumata əsasən, dövlət vəsaiti hesabına verilən ipoteka kreditlərinin ümumi məbləği 2,878 milyard manata çatıb. İndiyə qədər təxminən 48 min ipoteka krediti verilib. 

Dövlət vəsaiti hesabına verilən ipoteka kreditləri Azərbaycanda indiyə qədər verilən bütün ipoteka kreditlərinin (3,629 milyard manat) 79,3 faizini təşkil edib. Başqa sözlə, indiyə kimi verilən 1000 manatlıq ipoteka kreditinin 793 manatı dövlət vəsaiti hesabına ayrılıb. 

Vasif