Əfqanıstanda qəzaya uğrayan Rus təyyarəsindən 1,2 milyon dollar oğurlanıb
Rusiya biznes təyyarəsindən külli miqdarda pul yoxa çıxıb.
Sfera.az xəbər verir ki, bu yaxınlarda Əfqanıstan dağlarında qəzaya uğrayan Rusiyaya məxsus “Falcon 10” təyyarəsindən 1,2 milyon dollar oğurlanıb.
Əfqanıstan hakimiyyəti Bədəxşan əyalətində qəzaya uğrayan biznes təyyarəsindən xeyli miqdarda pul oğurlayan şəxsləri axtarır.
Jurnalistlərin sözlərinə görə, hadisə yerinə ilk gələn Taliban hərəkatının yerli hərbi hissəsinin oğurluqda əli olub-olmaması yoxlanılır.
Mənbələrin məlumatına görə, vəsaitin ümumi dəyəri aşkar edildikdən sonra Talibanın Bədəxşan qubernatoru Məhəmməd Əyyub Xalid hadisəni araşdırmaq üçün xüsusi komissiya təşkil edib.
Vilayətdəki Taliban kəşfiyyatının rəhbəri oğruların tapılması üçün məsuliyyəti öz üzərinə götürüb. Onlar həmçinin hadisə yerinə ilk gələn qrupun ordu qərargahının rəhbəri Fasihuddin Fitre ilə əlaqəli olan Talibanı da yoxlayacaqlar.
Qəzanın təfərrüatları
Xatırladaq ki, göyərtəsində rusların olduğu “Falcon 10B” təyyarəsi yanvarın 20-də iki mühərrikinin sıradan çıxması səbəbindən Əfqanıstan dağlarında qəzaya uğrayıb. Qəza ABŞ və Aİ-nin 2022-ci ilin fevral ayından təyyarələrin yeni tədarükü, texniki xidməti və sığortasına sanksiyalar tətbiq etməsindən sonra ilk dəfə baş verib.
Jurnalistlərin məlumatına görə, Əfqanıstanda qəzaya uğrayan təyyarə Pattayadan (Tayland) Moskvaya şəxsi tibbi evakuasiya reysi həyata keçirirmiş. O, yanacaq doldurmaq üçün Hindistanın Qaya şəhərinə enib. Təyyarədə altı nəfər - dörd ekipaj üzvü və iki sərnişin olub.
Qəzadan əvvəl pilot texniki nasazlıqlar barədə məlumat verib. Təyyarə hərəkət trayektotiyasından çıxaraq Tacikistanla sərhədə yaxın Vaxan bölgəsində Tofan dağına düşüb.
Aysel
Sfera.az
