Azərbaycanın kredit təşkilatlarından fiziki şəxslərin aldığı kreditlər üzrə yaranan borc 2,73 milyard manatdan çox artıb. 

Sfera.az rəsmi məlumatlara istinadən bildirir ki, 2022-ci ilin sonunda əhalinin kredit borcu 11,273 milyard manat idi. 2023-cü ilin sonunda kredit borcunun məbləği 14 milyard manatı ötüb. 

Son bir ildə kredit borcunun məbləğində 2,66 milyard manatdan çox, yəni 23,6 faiz artım baş verib. 

Əhali daha çox krediti banklardan götürür. Borcun 13,5 milyard manatdan çox hissəsi banklardan alınan kreditlərə görə yaranıb. 

Əhali kreditləri müxtəlif məqsədlər üçün alır. Kreditlərin daha çox hissəsi istehlak xərclərinin bir hissəsinin ödənilməsi üçün götürülür. Banklara istehlak kreditlərinə görə yaranan borc 6,94 milyard manatdır və banklara olan ümumi borcun 51,4 faizini təşkil edir. 

İpoteka ilə ev alınması məqsədilə də əhali çox kredit götürüb. Əhalinin hazırda banklara bu məqsədlə 3,63 milyard manat borcu var. 

Yerdə qalan təxminən 3 milyard manata yaxın olan borc isə sahibkarlıq məqsədilə alınan kreditlərə görə yaranıb. 

Ümumilikdə, banklar və mikromaliyyə təşkilatlarına yaranan borcun 58 faizdən çoxu əhali tərəfindən götürülən kreditlərə görə yaranıb.

Vasif