Dünya bazarında neftin alıcıları arasında rəqabət artıb. OPEC ölkələri neft istehsalını azaltsa da, bu, neft qiymətlərinin artımına təsir etməyib.

Sfera.az xəbər verir ki, bu barədə fikirləri politoloq Elxan Şahinoğlu bildirib.

“İran Çinə satdığı neftin həcmini azaldıb. Çünki İran öz neftini Çinə ucuz qiymətə satmaq istəmir və öz neftinin qiymətini artırmağa çalışır. İran ötən ilin dekabr ayında dəniz yolu ilə Çinə gündəlik 1.23 milyon barel neft nəql edib. Halbuki, noyabr ayında bu rəqəm 1.52 milyon barel idi. Çin neftə olan tələbatının 10 fazini İrandan əldə edir. İranın Çinə neft nəqlini azaltması, Çinin neftayırma zavodlarının gəlirlərini azaldacaq və bu ölkədə yanacağın qiymətini artıracaq. İran öz neftinin qiymətini artırmağa çalışmaqla Rusiyanın Çinə satdığı neftin qiyməti ilə bərabərləşdirmək istəyir. Rusiya istehsal etdiyi neftin təxminən 50 faizini Çinə satır, 40 faizi isə Hindistana nəql olunur”.

Ekspert bildirib ki, 2024-cü ildə neft ixrac edən ölkələr arasında rəqabət artacaq.

“Neft ixrac edən ölkələr neftin istehsal həcmini razılaşdırmağa çalışsalar da, buna 2024-cü ildə riayət etmək çətin olacaq. Həm Rusiya, həm də İran Qərbin sərt sanksiyalarına məruz qaldıqları üçün daha çox neft satmağa çalışır ki, iqtisadi itkilərini bu yolla kompensasiya edə bilsinlər. Səudiyyə Ərəbistanı Rusiya və İrandan fərqli olaraq neftini istənilən istiqamətdə rahat şəkildə sata bilir. Dövlət şirkəti olan “Saudi Aramco” köhnə alıcılarına neft satmaqla yanaşı, yeni alıcılar da cəlb etməyə çalışır. Səudiyyə Ərəbistanı Avropanın ən böyük neft təhcizatçısına çevrilib”.

Ülkər Abdurahmanlı