Dövlət Statistika Komitəsinin (DSK) açıqladığı məlumatlara əsasən, Azərbaycanda inflyasiya təkrəqəmli səviyyəyə düşüb.

Sfera.az DSK-ya istinadən xəbər verir ki, 2023-cü ilin yanvar-noyabr ayları ərzində qeydə alınan qiymət səviyyəsi ötən ilin eyni dövrü ilə müqayisədə 9,4 faiz yüksək olub. Bundan öncəki ayda dövrü inflyasiya 10,2 faiz idi.

Xatırladaq ki, ölkəmizdə 2022-ci ilin yanvarından ikirəqəmli inflyasiya müşahidə edilirdi. Ölkəmizdə 22 ay ərzində ikirəqəmli inflyasiya baş verdi.

İkirəqəmli inflyasiya ilk dəfə ötən ilin yanvarında qeydə alınmışdı. Həmin tarixdə dövrü inflyasiya 12,5 faizə yüksəldi. Sonrakı aylarda inflyasiyanın sürətlənməsi davam etdi və dövrü inflyasiya bu ilin yanvar-fevralında 13,9 faizə çatdı.

2023-cü ilin martından başlayaraq dövrü inflyasiyanın sürəti azalır. Azalmanın səbəbi illik inflyasiya sürətinin zəifləməsidir. DSK-nın məlumatına görə bu ilin noyabrında illik inflyasiya 2,6 faizə enib ki, bu da olduqca əlverişli göstəricidir.

Qeyd edək ki, 2023-cü ilin yanvar-noyabr aylarında ümumi inflyasiya 9,4 faiz olmaqla yanaşı ərzaq inflyasiyası 10,7 faizə, qeyri-ərzaq inflyasiyası 8,9 faizə, pullu xidmətlər üzrə inflyasiya 8,6 faizə düşüb.

İllik müqayisədə isə bahalaşma ərzaq mallarında 1,3 faiz, qeyri-ərzaqda 3,1 faiz, pullu xidmətlərdə 4 faiz təşkil edib.

Vasif