Gömrük limiti 150 dollara endirilir? – “Bu, biabırçılıqdır”

Son günlər sosial mediada gömrük limitinin 300 dollardan 150-yə endirilməsi ilə bağlı qərarın veriləcəyi iddia edilir. Bu isə vətəndaşların haqlı narazılığına səbəb olub.

Sfera.az-ın məlumatına görə, bununla bağlı fikirlərini bölüşən iqtisadçı Natiq Cəfərli deyib ki, artıq dünyada bəzi ölkələrdə onlayn ticarət ənənəvi satışları üstələyib:

“Şəhərin mərkəzində yerlərdə alış-veriş mərkəzləri, mağazalar, böyük ölçüdə məmurlara, onların ailə üzvlərinə məxsusdur. Onlar da həmin məkanları fantastik qiymətə icarəyə verirlər. Yəqin ki, onların icarədarları şikayət edirlər ki, hamınız səlahiyyət sahibisiniz, camaat xaricdən sifariş verir, bizim alverimiz ölür, nəticədə icarə haqqınızı verə bilmirik. Hakimi-mütləqlər də ortalığa mövzu atırlar ki, sifarişləri azaltsınlar, onlayn ticarəti məhv etsinlər”.

Qeyd edək ki, 2020-ci ildə də gömrük limiti endirilib. Həmin zaman qəbul edilən qərara əsasən, xaricdən gətirilən malların limiti 1000 dollardan 300-ə salınıb. Bildirilib ki, vətəndaş ay ərzində bir neçə dəfə sifariş verə bilər, amma gətirdiyi malların ümumi həcmi 300 dolları keçməməlidir.

Günay