Dünyada neftə tələb uzun müddət yüksək olacaq
Dünyada yaşıl enerji növlərinə keçid sürətləndiyi bir vaxtda iri neft şirkətlərindən olan “Exxon Mobil” və “Chevron” ənənəvi enerji sahələrinə böyük sərmayə qoyurlar.
Sfera.az “NBCnews”a istinadən xəbər verir ki, bu, iki iri şirkətin hələ də neft və qaz bazarının perspektivinə inanmasını göstərir. Xatırladaq ki, iki həftə əvvəl “Exxon Mobil” neft şirkəti bu sahədə fəaliyyət göstərən “Pioneer Natural Resources” şirkətini 59,5 milyard dollara satın aldı. Bazar ertəsi isə “Chevron” neft və qaz şirkəti “Hess” şirkətini 53 milyard dollara satın almağı planlaşdırdığını açıqladı.
Ekspertlərin fikrincə, iki iri şirkətin böyük sərmayə qoyuluşu onu göstərir ki, neft və qaz bazarının əsas oyunçuları yaxın gələcəkdə neftə tələbatın sonunu görmürlər. Ekspertlər bildirir ki, iri şirkətlər növbəti ən azı 20-25 ildə neft və qaza kifayət qədər böyük tələbin olacağını düşünürlər. Neftə tələbin pik nöqtəsinin nə vaxt olacağı ilə bağlı sonsuz mübahisələr var. Lakin hazırda qlobal neft istehlakı bütün zamanların ən yüksək həddinə çatmaq üzrədir. ABŞ-nin ən böyük neft və qaz istehsalçıları hesab edir ki, neftə yüksək tələbat uzun bir yol qət edəcək. Bununla belə qlobal miqyasda təmiz, yəni yaşıl enerjiyə sərmayə sürəti artır.
Beynəlxalq Enerji Agentliyinin məlumatına görə, 2023-cü ildə qlobal enerji bazarlarına 2,8 trilyon dollar sərmayə qoyulacaq ki, bunun da 1,7 trilyon dolları təmiz texnologiyalara olacaq. Qalan 1 trilyon dollardan bir qədər çox hissə kömür, qaz və neft kimi qalıq yanacaqlara gedəcək.
Vasif