“Artıq “Muğan Bank”da qorunan əmanətlərə faiz hesablanmır”.

Sfera.az bildirir ki, bunu iqtisadçı deputat Vüqar Bayramov deyib. Onun sözlərinə görə, bankda depoziti olanların əmanətləri üzrə faizlər sığorta hadisəsinin baş verdiyi günə qədər hesablanmış məbləğdə ödənilir:

“Sığorta hadisəsi isə bankın məcburi ləğv edilməsi və ya müflis elan olunması barədə məhkəmə qərarının qüvvəyə minməsidir.  Əmanətlərin ödənilməsinin 90 və bəzi hallarda 180 gün tələb etdiyini nəzərə alsaq, o halda bu müddətdə əmanətlər passiv vəsait kimi hesabda qalacaq.  Məsələn, vətəndaşın bankda 30 min manat əmanəti olub və bank müflis olandadək onun depozitinə 2700 manat faiz hesablanıb. Bununla da cəmi əmanət məbləği 32700 manat olub. Əgər bank müflis olmasaydı, onun depoziti ilin sonunda 33600 manat olmalı idi. Amma bank müflis olduğundan onun depoziti 3 ay sonra ödənilsə də, vətəndaş 33600 manat deyil, 32700 manat alır. Praktik olaraq, vətəndaşın depoziti ondan asılı olmayan səbəbdən hesabda passiv formada saxlanılır”.

Millət vəkili qeyd edib ki, vətəndaşın müflis olan bankda krediti varsa, həmin kreditə faiz hesablanması davam edir:

“Eyni vətəndaşın “Muğan Bank”da həm depoziti və krediti varsa, o halda onun depozitinə faiz gəliri hesablanması dayandırılır, kreditinə isə aylıq faizlər əlavə olunur. Nəticədə, depozit üzrə tam gəlir əldə edə bilməyən vətəndaş kredit üzrə öhdəliyini tam ödəməli olur. Təklif edirəm ki, əmanətlərə faizlər sığorta hadisəsi baş verən günə deyil, vəsaitin ödənilməsi barədə qərar verilən tarixədək hesablansın. Bu halda 12 fazilə bankda 30 min manat əmanəti olan vətəndaşın depozitinə 3 ayda orta hesabla 900 manat faiz gəliri hesablanıb əlavə olunacaq. Vətəndaşın sığortalanmış depoziti ödənilən zaman ona 32700 manat deyil, müqavilədə göstərilən kimi 33600 manat veriləcək. Nəticədə, bankın müflis olması vətəndaşımızın əmanət gəlirlərini azaltmayacaq”.

Günay