“Pul bazasının optimallığı həm inflyasiya yaradıcı effektlərin tənzimlənməsinə, həm də real sektorun dəstəklənməsinə xidmət etməlidir. Buna görə də, pul bazasının optimallaşdırılması siyasəti real sektorun canlanmasını xüsusi təşviq etməlidir. Bu baxımdan, kiçilmə deyil, optimallaşdırma siyasətinə üstünlük verilməlidir”.

Sfera.az xəbər verir ki, bunu millət vəkili, iqtisadçı Vüqar Bayramov son iki ayda pul bazasının kiçilməsi faktını şərh edərkən bildirib. 

Xatırladaq ki, 2023-cü ilin iyul və avqust aylarında pul bazası kiçilib. İyunda 18,4 milyard manat olan pul bazasının həcmi sentyabrın 1-də 18,1 milyard manata geriləyib. Son 2 ayda isə pul bazası 300 milyon manata yaxın azalıb. İki aylıq azalmalara rəğmən pul bazası bu ilin əvvəlinə nisbətən yüksəkdir.

Pul bazasının tərkibinə dövriyyədə olan nağd pul və bank ehtiyatları (kommersiya banklarının Mərkəzi Bankdakı müxbir hesablarının qalıqları) daxildir. 

V.Bayramov hesab edir ki, pul bazasının kiçilməsi Mərkəzi Bankın müvafiq tədbirləri ilə bağlı olub. Onun sözlərinə görə burada əsas məqsəd tələbin optimallaşdırılması və bu yolla inflyasiyanı cilovlamaqdır:

“Pul bazasının genişlənməsi tələbi artırır, kiçilməsi istehlak tələbini məhdudlaşdırır. İstehlak tələbinin azalması isə təklifin dəyişmədiyi halda antiinflyasiya effektinə malik olur”.

Millət vəkili bildirdi ki, pul bazasının kiçilməsi inflyasiyaya qarşı mübarizədə effektli olsa da, real sektorun pulla təminatını azaldır. Buna görə də V.Bayramov Mərkəzi Banka pul siyasəti ilə bağlı daha optimal davranmağı məsləhət görür:

“Pul bazası genişləndikcə xərcləmələr və real sektorda tələb də yüksəlir ki, bununla da istehsal üçün daha çox imkanlar yaradır. Bu kontekstdə pul bazasının optimallığı həm inflyasiya yaradıcı effektlərin tənzimlənməsinə, həm də real sektorun dəstəklənməsinə xidmət etməlidir. Buna görə də, pul bazasının optimallaşdırılması siyasəti real sektorunun canlanmasını xüsusi təşviq etməlidir, kiçilmə deyil, optimallaşdırma siyasətinə üstünlük verilməlidir”.

Vasif