Azərbaycanda sənaye məhsullarının 73 faizini əcnəbilər istehsal edir

Azərbaycanda sənaye məhsullarının böyük hissəsini hələ də əcnəbi şirkətlər istehsal edir.

Sfera.az xəbər verir ki, bu vəziyyət 2022-ci ildə bir qədər də pisləşib.

Ötən il Azərbaycanda 86,38 milyard manat dəyərində sənaye məhsulu istehsal olunub.

Bir il əvvəlki dövrlə müqayisədə dəyər ifadəsində sənaye məhsulunun istehsalı 31,15 milyard manat, yəni 56 faizdən çox artıb.

Bu qədər məhsulun 63,3 milyard manatını (73,2 faiz) xarici mülkiyyətdə olan müəssisələr istehsal edib. 2021-ci ildə sənaye məhsulunun 63 faizi əcnəbilər tərəfindən istehsal olunmuşdu. Müqayisə göstərir ki, ötən ilə nisbətən əcnəbilərin sənaye istehsalındakı payı bir qədər də artıb.

Əcnəbilərin sənayedə rolunun bu qədər yüksək olması neft-qaz sənayesi ilə bağlıdır. Azərbaycan sənayesində neft-qaz istehsalının payı çoxdur və burada istehsal edilən məhsulun böyük hissəsi əcnəbilər tərəfindən təmin edilir. Buna görə də cəmi sənaye məhsullarının istehsalında əcnəbi şirkətlər ilk sırada yer tutur.

Sənaye məhsulunun daha 2,3 faizi əcnəbilərlə yaradılan birgə müəssisələr tərəfindən istehsal olunub.

Qalan məhsulun 12 faizini yerli vətəndaşlara məxsus olan müəssisələr, təxminən bir o qədərini dövlət müəssisələri istehsal edir.

Vasif