Rusiya Ukraynanın taxıl yollarını bağladı,  ABŞ yeni dəhliz axtarışına BAŞLADI

Rusiyanın Qara dəniz taxıl dəhlizi sazişindən çıxmasından sonra ABŞ Ukraynanın taxıl ixracı üçün alternativ yollar tapmağa çalışır.

 
Sfera.az “Reuters”ə istinadən xəbər verir ki, ABŞ Dövlət Departamentinin sözçünün müavini Vedant Patel Birləşmiş Ştatların Rusiyanı dərhal Qara dəniz taxıl dəhlizi sazişinə qayıtmağa çağırıb. 

Patel ABŞ-nin taxılın ixrac ünvanlarına çata bilməsi üçün alternativ yol və dəhlizlər axtardığını söyləyib. ABŞ rəsmisi Rusiyanın yenidən razılaşmaya qayıdacağına inanmır. Onun sözlərinə görə buna dair hər hansı əlamət yoxdur. 

Xatırladaq ki, Qara dəniz taxıl dəhlizi sazişindən imtina etdikdən sonra Rusiya dünyanın ən böyük taxıl ixracatçılarından biri olan Ukraynanın kənd təsərrüfatı və liman infrastrukturuna hücumlara başlayıb. Hücumlar arasında Dunay çayı üzərində yerləşən Reni və İzmail limanları da var. 

Rusiya taxıl dəhlizi sazişindən çıxmazdan əvvəl Dunay limanları vasitəsilə Ukraynanın taxıl ixracının təxminən dörddə biri həyata keçirilirdi. Bu limanlarda taxıl barjalara yüklənərək, Avropa İttifaqının və NATO-nun üzvü olan Rumıniyanın ərazi suları vasitəsilə çayın aşağı axınına, sonra buradan Rumıniyanın Qara dənizdəki Konstansa limanına ötürülür, daha sonra isə gəmilərlə daşınırdı. Ukrayna rəsmiləri bildiriblər ki, hücumlar nəticəsində ərzaq ixracı üçün mühüm marşrut olan Dunayın Reni limanındakı taxıl anbarlarına ziyan dəyib. 

Vasif