Bu gün Azərbaycanda filtrli siqaretlərin qiymətində növbəti artım qeydə alınıb.

Sfera.az xəbər verir ki, son illərdə Azərbaycanda siqaretlərin qiymətində müntəzəm artım baş verir. Davamlı qiymət artımları hesabına 2018-2022-ci illərdə siqaretlərin qiyməti 2 dəfəyə yaxın artıb.

2018-ci ildə satılan filtrli siqaretlərin bir qutusunun qiyməti orta hesabla 1,4 manat olub. 2023-cü ilin əvvəlində orta qiymət 2,6 manata çatıb. Müqayisə göstərir ki, beş il ərzində siqaretlərin qiymət səviyyəsi 1,2 manat, yəni 85 faizdən çox artıb.

Siqaretlərin qiymətinin sürətlə artması onun istehlakını azaldıb. Rəsmi statistikaya əsasən son 5 ildə qiymətlər 85 faiz artdığı halda tütün məmulatlarının satış dövriyyəsi cəmi 50 faiz artıb. Belə ki, tütün məmulatlarının dövriyyəsi 2018-ci ildə 1,07 milyard manat dəyərində olduğu halda, ötən il 1,61 milyard manat təşkil edib.

Satış dövriyyəsindəki artım sürətinin qiymətlərdəki artım sürətindən aşağı olması onu göstərir ki, ölkəmizdə tütün məmulatlarının istehlakı azalıb.

Tütün məmulatlarının istehlakında azalma 2020-ci ildən müşahidə edilir. Həmin ildə tütün məmulatlarının istehlak miqdarı 5,1 faiz azalıb. Azalma 2021-ci ildə 0,6 faiz, 2022-ci ildə 1,4 faiz olub.

Ev təsərrüfatlarının tədqiqinə dair açıqlanan məlumatlardan isə bəlli olur ki, Azərbaycan əhalisinin 15 faizi siqaret çəkir. Siqaret çəkənlər gün ərzində orta hesabla 16 ədəd siqaretdən istifadə edir.

Vasif