Azərbaycanın bu rayonlarında mehmanxana yoxdur, ən çox mehmanxana isə... – STATİSTİKA

2023-cü ilin əvvəlinə aid olan məlumata əsasən Azərbaycanda 757 ədəd mehmanxana var.

Sfera.az xəbər verir ki, mehmanxanaların sayı son bir ildə 45 ədəd, son 5 ildə 136 ədəd artıb.

Mehmanxanaların sayının artımında Bakı əsas rol oynayıb. Say artımında hər iki mehmanxanadan 1-i Bakının hesabına baş verib.

Beş il ərzində paytaxtda mehmanxanaların sayı 77 ədəd artıb və Bakıda mehmanxanaların ümumi sayı 265-ə çatıb.

Paytaxtda olan mehmanxanalar əsasən 3 rayondadır. Bu rayonlar Səbail, Nəsimi və Nərimanovdur. Səbaildə 73, Nəsimidə 49, Nərimanovda 47 mehmanxana fəaliyyət göstərir.

Bakının ən kiçik rayonu olan Pirallahıda isə mehmanxana yoxdur.

Paytaxtdan kənarda 492 mehmanxana var.

Əyalətlərdə ən çox mehmanxana Xaçmaz rayonundadır. Bu rayonda 57 mehmanxana fəaliyyət göstərir. Son 5 ildə Xaçmaz rayonunda mehmanxana sayı cəmi 3 vahid artıb.  

Mehmanxana sayı çox olan digər rayonlar Masallı (30 ədəd), Quba (29 ədəd), Lənkəran (26 ədəd), Şamaxı (23 ədəd), Qəbələ (23 ədəd), İsmayıllı (22 ədəd), Qusardır (20 ədəd).

Azərbaycanda bəzi rayonlarda (işğaldan azad edilən rayonlar nəzərə alınmır – red.) mehmanxana yoxdur. Həmin rayonlar Qobustan, Samux, Siyəzən, Ucar, Hacıqabul və Neftçaladır. 

Son  ildə mehmanxana sayında ən çox artım Cənub və Şimal-Qərb regionunda qeydə alınıb. Cənubda mehmanxanaların sayı 12 ədəd, Şimal-Qərbdə 11 ədəd artıb.

Vasif