“Azərbaycanda, xüsusilə Bakıda daşınmaz əmlakların satış qiymətlərində ciddi artımlar müşahidə olunur”.

Bunu Sfera.az-a açıqlamasında əmlak məsələləri üzrə ekspert Elnur Fərzəliyev deyib. Onun sözlərinə görə, artıq nağd qiymətə mənzil almaq hamı üçün əlçatan deyil:

“Buna görə də insanlar məcburən banklara, kreditli şərtlərlə satılan mənzillərə üz tuturlar. Ötən il çoxmənzilli yaşayış binalarında satılan mənzillərin böyük hissəsi ipoteka, bank daxili və tikinti şirkətləri tərəfindən daxili kreditli şərtlərlə satılıb. Əmlak Məsələləri Dövlət Xidmətinin məlumatına əsasən, 2022-ci ilin yanvar-noyabr ayları ərzində qeydiyyata alınan girov müqaviləsinin sayı ötən ilin eyni dövrü ilə müqayisədə 38% artaraq 64963 olub. Bu məlumat yalnız çıxarışlı mənzillərə şamil olunur. Çıxarışı olmayan, yəni tikilməkdə və yaxud hazır binalarda olan, daxili kreditlərlə satılan mənzillərin sayı da kifayət qədərdir”.

Ekspert bildirib ki, ipoteka kreditlərinin şərtləri ağırdır:

“Bu səbəbdən əksər vətəndaşlar faiz dərəcəsinin yüksək olmasına baxmayaraq, daxili kreditlərlə satılan mənzillərə daha çox müraciət edirlər. Bu prosesin uzun illərdir davam etdiyini nəzərə alsaq, deməli, ölkədə yüz minlərlə daşınmaz əmlaklar banklarda girovdadır. Həmin mənzillərin sahibləri ömürlərinin ən azı 20-25 ilini banklara kredit ödəməklə keçirirlər”.

Günay Rəsulqızı