Azərbaycan Respublikası Dövlət Neft Fondunun (ARDNF) son illərdə əldə etdiyi gəlirin böyük hissəsi səhmlərdən və daşınmaz əmlakdan daxil olub. 

Sfera.az ARDNF-in açıqladığı məlumatlara istinadən xəbər verir ki, səhmlərə və daşınmaz əmlaka az investisiya edilməsinə baxmayaraq, onlar Azərbaycana digərlərindən daha çox qazandırıb. 

Ümumilikdə ARDNF-in investisiya portfeli 49,033 milyard dollar təşkil edib. Bunun 30,43 milyard dolları sabit gəlirli qiymətli kağızlara, 9,61 milyard dolları səhmlərə, 3,05 milyard dolları daşınmaz əmlaka, 5,94 milyard dolları qızıla qoyulub. 

2018-2022-ci illərdə aktivlər üzrə gəlirlərə dair açıqlanan məlumatlardan görünür ki, səhmlərin və daşınmaz əmlakın payının sabit gəlirli qiymətli kağızlardan az olmasına baxmayaraq, əldə edilən gəlirlər daha çox olub. 

Beş il ərzində sabit gəlirli qiymətli kağızlardan 748 milyon dollar gəlir əldə edilib. Bu müddətdə daşınmaz əmlakdan gəlirlər 911 milyon dollar, səhmlərdən gəlirlər isə 1,218 milyard dollar olub. 

Buna görə də gələcəkdə səhmlərə və daşınmaz əmlaka investisiyaların artırılması gəlirlərin artırılması baxımından böyük əhəmiyyətə sahib olacaq. 

Hazırda səhmlərə qoyulan investisiyanın ümumi sərmayə portfelində payı 19,6 faiz, daşınmaz əmlakın payı isə 6,2 faizdir. Gələcəkdə səhmlərin payının 25 faizə, daşınmaz əmlakın payının 10 faizə çatdırılması nəzərdə tutulub. 

ARDNF səhmlərin və daşınmaz əmlakın payındakı artıma sabit gəlirli qiymətli kağızların payını azaltmaq yolu ilə nail olmaq istəyir. 

Vasif