“Türkiyə məzənnə stabilliyini qısa deyil, daha çox orta və uzun müddətli dövr üçün hədəfləyir”.

Sfera.az bildirir ki, bunu iqtisadçı deputat Vüqar Bayramov deyib. O qeyd edib ki, iqtisadi amillərlə yanaşı siyasi faktorlar və eləcə də 50 faizə çatan illik inflyasiya dərəcəsi lirənin qısa müddətdə stabilləşməsini əngəlləyir:

“Türkiyədə yeni kabinetin fərqli yanaşması da lirənin məzənnəsindəki ucuzlaşmanın qarşısını ala bilmir. Digər tərəfdən, Türkiyənin yeni maliyyə nazirinin U dönüşlü mesajları maliyyə bazarlarında volatilliyi azaltsa da, stabilliyinə nail olmaq mərhələli prosesdir. Bu baxımdan strategiya qısa müddətlidən daha çox, uzun müddətli hədəflərə söykənilir.  Bunlarla yanaşı, Türkiyədə əvvəlki dövrdən fərqli olaraq Mərkəzi Bankın daha müstəqil qərarları, kabinetin yeni yanaşmaları qardaş ölkə iqtisadiyyatı ilə bağlı nikbinliyi artırır”.

Millət vəkili xatırladıb ki,  Türkiyə Azərbaycanın ikinci ən böyük ticarət tərəfdaşı və qeyri-neft ixracatında əsas partnyorudur: “Enerjidən kənar ixracatımızın 1/3-dən çoxu qardaş ölkəyə ünvanlanır. Bu baxımdan, strateji mütəffiqimiz olan Türkiyədə məzənnə stabilliyinə nail olunması bizim üçün həmçinin ixracatın həcmi baxımdan da vacibdir”.

Türkan