Avropa İttifaqı ölkələrində istehsal edilən benzin və dizel mühərrikli avtomobillərin dəyəri yaxın illərdə 2 min avrodan çox bahalaşacaq. 

Sfera.az xəbər verir ki, belə bir açıqlama ilə Avropa Avtomobil İstehsalçıları Assosiasiyası (ACEA) çıxış edib. 

ACEA bahalaşmanın səbəbini Avropa İttifaqına (Aİ) üzv olan ölkələrdə “Avro 7” ekoloji standartlarının tətbiqi ilə əlaqələndirib. 

Aİ ölkələri 2025-ci ilin iyul ayında minik avtomobillərində, 2027-ci ilin iyul ayında isə ağır çəkili avtomobillərdə “Avro 7” standartlarının tətbiqinə başlayacaq. Yeni standartlar atmosfer havasına atılan zərərli qazların miqdarının bir qədər də azaldılmasını nəzərdə tutur. 

ACEA hesab edir ki, sərt emissiya qaydaları avtomobil istehsalçılarının xərclərini artıracaq: “Yeni standartlara uyğun olaraq, daxili yanma mühərrikli avtomobillər və mikroavtobuslar üçün bir avtomobilin qiyməti təxminən 2000 avro, dizel yük maşınları və avtobuslar üçün isə təxminən 12 000 avro əlavə xərc yaradacaq. Bu rəqəmlər Avropa İttifaqı Komissiyasının “Avro 7”-yə keçidlə bağlı hesabladığı qiymətlərdən xeyli yüksəkdir. Komissiya qiymətləndirməsində minik avtomobilləri və mikroavtobuslarda xərclərin 180-450 avro, yük maşınları və avtobuslar üçün 2800 avro dəyərində artacağını təxmin etmişdi”.

Vasif