Bu günlərdə başa çatan G7 sammitində Rusiyada çıxarılan almaz və qızılın ixracına embarqo qoyulmasına dair qərar qəbul edilib. Bu qərarın dünyada zinət əşyalarının dəyərində artıma səbəb olacağı ehtimal olunur. 

Sfera.az xəbər verir ki, Türkiyə mediasına açıqlama verən Zərgərlik Məmulatları İxracatçıları Birliyinin sədri Burak Yakın bunun səbəbini Rusiyanın dünya almaz və qızıl bazarında böyük paya sahib olması ilə əlaqələndirib.

O deyib ki, dünyanın xam almaz tələbatının təxminən 60 faizini Rusiya təmin edir. Burak Yakın qızıl xammalı ilə təminatda da Rusiyanın önəmli tərəfdaş olduğunu vurğulayıb:

“Qızılla bağlı qərar Türkiyə üçün vacibdir. Rusiyada LBMA (London Bullion Market Association) tərəfindən təsdiq edilən 6 qızıl emalı zavodu var. Embarqoya görə bu zavodlarının bağlanması regionun ən böyük alternativi olan Türkiyədə qızıl emalı zavodlarının məhsullarına tələbatı artıracaq. Təbii ki, qızıl və almaz tədarükü azaldıqca zərgərlik sənayesinin xərcləri də artacaq və bu, qiymətlərdə öz əksini tapacaq”.

Onun sözlərinə görə yeni qərar dünyada almazın bahalaşmasını qaçılmaz edəcək. Burak Yakın almazla bərabər qızıldan alınan zərgərlik məmulatlarının da dəyərinin yüksələcəyini bildirib. 

Qeyd edək ki, Azərbaycan 2022-ci ildə təxminən 28 milyon dollar dəyərində qızıl-zinət əşyası idxal edib. Zinət əşyalarının əsas hissəsi İtaliyadan, qalan hissəsi İsveçrə, Meksika, Almaniya, ABŞ, Türkiyədən alınıb. 

Dünyada zinət əşyaları bahalaşarsa, bu, Azərbaycanda olan qiymətlərə də təsir edəcək. 

Vasif