Doqquz gün iş olmaması dollara tələbi ARTIRDI
Azərbaycan Mərkəzi Bankında bu gün keçirilən valyuta hərracında tələbin kəskin artması müşahidə edilib.
Sfera.az xəbər verir ki, hərracda tələb 96,3 milyon dollara yüksəlib. Bu məbləğ əvvəlki hərraclarda satılan valyutanın məbləğindən ən azı 2 dəfə yüksək olub.
Bəs son hərracda tələbin kəskin artması nə ilə bağlıdır?
Tələbin artmasının əsas səbəbi Novruz bayramı ilə əlaqədar 12 gün ərzində hərracın keçirilməməsidir. Əvvəlki tarixlərdə adətən 3-4 gündən bir hərrac keçirilirdi. Amma martın 18-26-sı tarixlərində 9 gün qeyri-iş günü olması hərracların keçirilməsinə imkan verməyib. Buna görə də, bu gün keçirilən hərracda tələb böyük olub.
Ümumilikdə mart ayı ərzində hərraclarda tələb 318,6 milyon dollar təşkil edib. Tələbin bu qədər olması yüksək hesab edilmir. Çünki 2023-cü ildə hərraclarda hər ay 600 milyon dollara yaxın valyutanın satılması nəzərdə tutulur. Faktiki satış proqnozlaşdırılan məbləğdən xeyli azdır.
Vasif