Azərbaycanda ən çox mal-qara hansı rayon və şəhərdə saxlanılır? - STATİSTİKA
Azərbaycanın bütün şəhər və rayonlarında iri və xırda buynuzlu mal-qara saxlanılır. Amma bəzi rayonlar mal-qara sayına görə digərlərindən kəskin fərqlənir.
Sfera.az xəbər verir ki, 2022-ci ilin sonunda ölkəmizdə 2,628 milyon baş iribuynuzlu, 7,77 milyon baş xırdabuynuzlu mal-qara var.
İribuynuzlu mal-qaranın 2,52 milyon başı inək, 129 mini camış naxırına aid olan heyvanlardan, xırdabuynuzluların isə 7,77 milyonu qoyun və keçilərdən ibarətdir.
Azərbaycanda ən çox iribuynuzlu heyvan Sabirabadda saxlanılır. Bu rayonda 124 min iribuynuzlu heyvan var. Bərdədə 100 min, İmişlidə 96,5 min, Cəlilabadda 91 min iribuynuzlu mal-qara bəslənir.
Azərbaycanın ən böyük heyvan bazarlarından birinin yerləşdiyi Beyləqan rayonunda cəmi 60 min iribuynuzlu saxlanılır.
Ölkəmizdə ən az iribuynuzlu heyvan saxlanılan rayon və şəhərlər isə Naftalar şəhəri (527 baş) və Gəncə şəhəridir (850 baş). Paytaxt Bakıda 7 306 baş iribuynuzlu mal-qara bəslənir.
Qoyun və keçi sayında da Aran rayonları öndədir. Beyləqan rayonunda 303,4 min baş, Şəmkir rayonunda 265 min baş, İmişli rayonunda 256,5 min baş, Ağcəbədi rayonunda 256 min baş, Quba rayonunda 236 min baş, Sabirabad rayonunda 235 min baş qoyun və keçi saxlanılır.
Ən az qoyun və keçi saxlanılan yaşayış məntəqəsi isə Gəncə (1320 baş) və Naftalan şəhərləridir (2400 baş). Bakıda 20 449 baş qoyun və keçi saxlanılır.
Qeyd edək ki, Azərbaycan özünü mal əti ilə 92 faiz, qoyun və keçi əti ilə 98 faiz təmin edir.
Vasif
