Dünya bazarında neftin qiyməti bir qədər bahalaşıb. Treyderlər Çində koronavirus məhdudiyyətləri yumşaldıqdan sonra tələb artımı perspektivini də qiymətləndirirlər.

Belə ki, Brent markalı neftin fevral fyuçerslərinin qiyməti 0,24% artaraq 84,88 dollar/barelə, WTI markalı neftin fevral fyuçerslərinin qiyməti 0,14% artaraq 79,64 dollar təşkil edib.

Maraqldır, qiymətlərin artması Azərbaycan neftinə də təsir göstərəcəkmi?

Məsələ ilə bağlı Sfera.az-a danışan iqtisadçı ekspert Samir Cəlilov neftin qiymətinin ciddi şəkildə artmadığını deyib:

"Rusiya-Ukrayna konflikti hərbi fazaya keçdikdən sonra belə neftin qiymətində hansısa böyük artımın olduğunu hiss etməmişik. Bu özlüyündə onu göstərdi ki, istehsal bazarlarında təminat məsələsi yetərincədir, bazarlarda hansısa təlatüm yoxdur. Ona görə də neftin qiyməti demək olar ki, müharibədən əvvəlki rəqəmlərin ətrafında dəyişir. Artıq qış fəsli olduğu üçün mövsümlə əlaqədar bazarlara enerji ilə bağlı müəyyən təsirlər var, lakin ciddi qiymət dəyişikliyi olmayacaq".

Ekspert yaz aylarına doğru Rusiya-Ukrayna müharibəsinin aktiv fazası dayanarsa, qiymətlərin aşağı düşə biləcəyini də qeyd edib:

"Hələlik neftin qiymətində ciddi artımlar olmayacaq. Hərbi qarşıdurmanın aktiv fazası başa çatdıqdan sonra, yəni üzü yaz aylarına doğru neftin qiyməti aşağı düşəcək. Neftin qiymətinin aşağı düşməsinin isə Azərbaycana ciddi təsiri olmayacaq. Çünki nefti hansı qiymətə satmağımızdan asılı olmayaraq qazanırıq. Bizim dünya bazarına təsirimiz yoxdur".

Əzizə Zeynal