Büdcənin xərcləri minimum həddə düşüb - SƏBƏB

Bu il dövlət büdcəsinin gəlir və xərclərinin ümumi daxili məhsula (ÜDM) nisbəti son illərin ən aşağı həddinə düşüb.

Sfera.az xəbər verir ki, 2022-ci ilin yanvar-oktyabr ayları ərzində büdcənin gəlirləri 27,029 milyard manat olmaqla ÜDM-in 24,3 faizinə bərabər olub. Bu, 2017-ci ildən sonrakı ən aşağı həddir. 

Büdcə xərclərinin ÜDM-ə nisbəti isə bir qədər də aşağı düşüb. Belə ki, büdcənin xərcləri 23,2 milyard manat olmaqla ÜDM-in 20,9 faizinə bərabər olub. Bu cür aşağı göstəriciyə 2012-ci ildən sonra təsadüf olunmayıb. 

Büdcənin gəlir və xərclərinin ÜDM-ə nisbətinin aşağı düşməsi iqtisadiyyatda yaradılan nominal dəyərin kəskin artması ilə bağlıdır. 2021-ci ilin yanvar-oktyabr dövrü ilə müqayisədə bu ilin eyni dövründə ÜDM-in nominal dəyəri 38,62 milyard manat, yəni 53,3 faiz artıb. 

ÜDM-in nominal dəyərinin bu qədər artması qiymətlərdəki dəyişikliklə bağlıdır. Bunu ÜDM-in defilyatorundan da görmək olar. ÜDM-in defilyatoru (ölkə istehsal olunan məhsullarının qiymətindəki dəyişikliyi əks etdirən göstərici) 45,7 faizə yüksəlib. Bu göstərici 2021-ci ildə 21,3 faiz, 2020-ci ildə isə mənfi 7,6 faiz idi.

ÜDM-in defilyatorunun bu dərəcədə yüksəlməsi istehsalın nominal dəyərini kəskin artırıb və nəticədə büdcənin ÜDM-ə nisbəti minimum həddə düşüb. 

Vasif
Sfera.az