“Tayvanda müharibə başlayarsa, dünya iqtisadiyyatı hər il 2.5 trilyon dollar itirəcək”.

Sfera.az xəbər verir ki, bunu “Financial Times” dərgisində yayımlanan məqaləyə istinadən “Atlas” Araşdırmalar Mərkəzinin rəhbəri, politoloq Elxan Şahinoğlu bildirib. 

E.Şahinoğlu qeyd edib ki, ABŞ Dövlət Departamentinin sifarişi əsasında “Rhodium Group” analitik şirkəti müharibənin mümkün iqtisadi nəticələri ilə bağlı hesabat hazırlayıb.

“Analitiklərin fikrincə, müharibə həm Tayvan, həm də Çin iqtisadiyyatında böyük zərbə vuracaq və bundan sonra dünya iqtisadiyyatında “domino effekti” yaranacaq”, - deyən politoloq ehtimal edilən müharibədən ən çox Cənub-Şərqi Asiya ölkələrinin zərər görəcəyini söyləyib:

“Avtomobillərin, kompüterlərin və mobil telefonların istehsalında qeyri-sabitlik yaranacaq. Bu isə dünya ticarətini silkələyəcək. Analitiklərin fikrincə, bu durum onsuz da problemlərlə üzləşən Avropa üçün də yeni problemlər yaradacaq”.

 
E.Şahinoğlu bildirib ki, Çin enerji asılılığını minimum endirmək məqsədilə kömürlə işləyən elektrik stansiyaların sayını artıracaq:

“Karbon emissiyalarının azaldılması ilə bağlı öhdəliklərin əksinə olaraq, Çin kömür hasilatını artırmağı və daha çox istilik elektrik stansiyaları tikməyə qərar verib. Bu, çirklənməni azaltmaq və bununla da qlobal istiləşməni dayandırmaq üçün qlobal səylərə böyük zərbə kimi qiymətləndirilir. Çin lideri Si Sinpin ölkəsinin təmiz enerji alternativi tapılana qədər kömürdən istifadə etməyə davam edəcəyini bildirib. Beləliklə, hazırkı 4,1 milyard ton kömür istehsalının azaltması əvəzinə, Çində kömür hasilatı 2025-ci ildə 4,6 milyard tona yüksələcək. Üstəlik, Çin xaricdə də kömür stansiyaları tikir”. 

Vasif