“Taxıl saziş”i daha 4 ay uzadıldı

BMT, Türkiyə, Rusiya və Ukrayna İstanbulda Ukraynanın üç dəniz limanından ərzaq ixracına dair “Taxıl sazişi”nin işini daha 120 gün davam etdirmək haqqında razılıq əldə edib.

Sfera.az “Unian.net” saytına istinadən xəbər verir ki, bu haqda məlumatı Ukraynanın infrastruktur naziri Aleksandr Kubrakov açıqlayıb. Onun sözlərinə görə, BMT və Türkiyə “Taxıl təşəbbüsü”nün həyata keçirilməsinin qarantı olaraq qalıb.

Yeni razılaşma noyabrın 19-dan qüvvəyə minir və 500 gəminin keçidinə razılıq verir. Bu gəmilərlə 11 milyon tondan artıq taxıl və qida məhsulları daşınacaq. 

Xatırladaq ki, bu ilin iyulun 22-də Ukrayna və Rusiya Türkiyənin vasitəçiliyi ilə Ukraynanın kənd təsərrüfatı məhsullarının ixracının bərpasına dair BMT ilə ayrı-ayrılıqda saziş imzalayıb. Sənədlər Çernomorsk, Odessa və Yujnı limanlarından məhsulların ixracını və təhlükəsiz marşrutların yaradılmasını nəzərdə tutur.

“Taxıl sazişi”nin imzalanmasından sonra dünyada buğda və digər əsas taxıl məhsullarında ucuzlaşma qeydə alınıb.

Vasif