Son aylarda Azərbaycan banklarında xarici ölkə vətəndaşlarına məxsus əmanətlərin məbləğində kəskin artım müşahidə edilir. Sürətli artım nəticəsində əcnəbilərin əmanətərinin cəmi əmanətlərdəki payı ötən ilin sonundakı 3,26 faizdən bu ilin oktyabrında 8,5 faizə yüksəlib. 

Sfera.az bildirir ki, ötən ilin sonunda əcnəbilərin Azərbaycan banklarında 301,3 milyon manat dəyərində əmanəti var idi. 2022-ci ilin oktyabrın 1-də, yəni 9 ay sonra əcnəbilərin əmanətlərinin həcmi 954,3 milyon manata yüksəlib. Müqayisə göstərir ki, qısa müddətdə əcnəbilər banklarımızdakı pullarını 3,17 dəfə artırıblar. 

2022-ci ildə əcnəbilərin əmanətlərinin həcmi sürətlə artaraq 900 milyon manatı ötsə də, mövcud göstərici rekord deyil. Rekord göstərici 2015-ci ildə qeydə alınıb. Həmin ilin sonunda əcnəbilərin pulunun məbləği 1,233 milyard manatı ötərək cəmi əmanətlərin 13 faizini təşkil etmişdi. Əcnəbilərin pulu 2016-cı ildə 967 milyon manata (cəmi əmanətlərin 13 faizi), 2017-ci ildə 745 milyon manata (əmanətlərin 9,85 faizi) düşdü. Sonrakı illərdə də azalma davam etdi və 2020-ci ilin sonunda 281 milyon manata, yəni cəmi əmanətlərin 3,43 faizinə gerilədi. 

Əcnəbilərin əmanətlərinin həcmində artım bu ilin fevralından müşahidə edilir. Yanvarda 294 milyon manat olan əmanətlər fevralda birdən-birə 552 milyon manata yüksəldi. 

Əcnəbilərin əmanətlərinin həcminin fevraldan sürətlə artması Rusiyanın üzləşdiyi sanksiyalarla bağlıdır. Rusiya vətəndaşı olan soydaşlarımız, Gürcüstan vətəndaşı olan azərbaycanlılar Rusiyada əmlaklarını sataraq pullarını Azərbaycana köçürür. Eyni zamanda sərbəst pul vəsaitlərinin də bir hissəsinin Azərbaycana transfert edildiyi məlumdur. Bu səbəbdən fevraldan, yəni müharibənin başladığı tarixdən etibarən, Azərbaycan banklarında əcnəbilərin pulları sürətlə artır. 

Mövcud dinamika nəzərə alınarsa, əcnəbilərin əmanətlərinin həcmində artım ilin sonuna qədər davam edəcək. Böyük ehtimalla ilin sonunda əcnəbilərin Azərbaycan banklarındakı pullarının məbləği 1 milyard manatı ötəcək və gələn il rekord göstərici yenilənəcək. 

Vasif,
Sfera.az