Dünyada neft istehsalı artır: 2023-cü ildə kəsir aradan qalxacaq
Beynəlxalq Enerji Agentliyinin (BEA) məlumatına əsasən, iyun ayında gündəlik neft hasilatının həcmi may ayına nisbətən 690 min barel artaraq 99,5 milyon barelə yüksəlib.
Sfera.az BEA-ya istinadən xəbər verir ki, gündəlik istehsalın artmasında Rusiya, ABŞ və Kanadanın payı daha böyük olub.
BEA-nın proqnozuna görə 2022-ci ildə neft hasilatıda artım davam edəcək və ilin sonunda 101,3 milyon barelə çatacaq. Artımın 380 min bareli OPEC+ ölkələrinin, 1,4 milyon bareli digər ölkələrin payına düşəcək.
Agentlik hesab edir ki, hasilat Rusiyada istehsalın azalması fonunda baş verəcək. Rusiyadakı azalmanı Liviya, Qazaxıstan və Körfəz ölkələrindəki artım kompensasiya edəcək.
BEA proqnozlaşdırır ki, dünyada gündəlik hasilat artdığı halda neftə olan tələb azalacaq. Agentliyin şərhinə görə yüksək qiymətlər neftə tələbi zəiflədir. BEA ortaillik neft tələbinin 99,2 milyon barel olacağını təxmin edir.
2023-cü ildə isə gündəlik tələb artaraq 101,4 milyon barelə çatacaq. BEA yalnız gələn il neft istehsalı ilə istehlakının tarazlaşacağını təxmin edir.
Dünyada ən çox nefti Asiya Sakit Okeanı regionu ölkələri istehlak edir. Bu region ölkələrinin ümumi tələbi 36,57 milyon bareldir. Amerika qitəsi ölkələri 30,93 milyon barel, Avropa ölkələri 14,218 milyon barel neft istehlak edir.
Vasif
Sfera.az