Qlobal bazarlarda artan inflyasiya narahatlıqları və bunun fonunda mərkəzi bankların sərt maliyyə siyasəti yürütməsi dünyada səhmlərin ucuzlaşmasına səbəb olur.

Sfera.az bildirir ki, mərkəzi banklar sərt maliyyə siyasəti yürütməyə başlayanda iqtisadiyyatlarda aktivlik aşağı düşür, nəticədə gəlirlilik azalır, hətta bəzi hallarda tənəzzül yaşanır.

İnvestorlar bu qanunauyğunluğu bildiyindən mərkəzi bankların sərt maliyyə siyasətinə başlamasından sonra məcburiyyət olmadığı təqdirdə səhm almaq istəmirlər. Sərmayəçilər bilir ki, sərt maliyyə siyasətinin nəticəsində qiymətlər enəcək, şirkətlərin gəliri azalacaq və nəticədə səhmlər də ucuzlaşacaq. Səhmlərin ucuzlaşacağı öncədən bəlli olduğundan heç bir investor yüksək qiymətə səhm almaq istəməz.

Buna görə də son aylarda səhmlərə tələb zəiflədiyindən onların dəyəri enir.

“Bloomberg”in məlumatına əsasən 2021-ci ilin noyabrında 122 trilyon dollarla rekord səviyyəyə çatan səhm bazarının dəyəri ötən müddətdə 22 trilyon dollar və ya 18 faiz azalıb. Bu dövrdə kiçilmənin 12 trilyon dolları ABŞ səhmlərində, 1,9 trilyon dolları Çində, 1,5 trilyon dolları Yaponiya səhmlərində və 800 milyard dolları Honq Konq birjalarında olub. Avropanın əsas indekslərində ucuzlaşma isə 3 trilyon dollara çatıb.

Dünyada səhm qiymətlərinin enməsi Azərbaycanın valyuta ehtiyatlarının əsas hissəsinin saxlandığı Neft Fondunin investisiya portfelini də ucuzlaşdırır. Son məlumata əsasən investisiya portfelinin 17,9 faizi səhmlərdən ibarətdir. 2021-ci ilin sonunda səhmlərin payı 18 faizdən yüksək idi.

Səhmlərin payının azalması məhz qiymətli kağızların ucuzlaşması ilə bağlıdır. Böyük ehtimalla bu ilin birinci rübündə olduğu kimi ikinci rübdə də səhmlərin ucuzlaşması Fondun aktivlərinə mənfi təsirini davam etdirəcək.

Vasif

Sfera.az