Türkiyənin məzənnə siyasəti özünü doğrultmur - Lirə yenə ucuzlaşacaq

Türkiyənin rəsmi qurumlarının açıqlamasına əsasən, ölkənin xarici ticarət əməliyyatlarında kəsirin həcmi artmaqda davam edir.

Sfera.az xəbər verir ki, mayda ixrac 15,2 faiz artaraq 18,973 milyard dollar, idxal 43,8 faiz artaraq 29,652 milyard dollar olub. Nəticədə bir ayda xarici ticarətdə 10,68 milyard dollar kəsir yaranıb.

Ötən ilin may ayında qeydə alınan kəsirlə müqayisədə bu il ticarət kəsirinin məbləği 6,68 milyard dollar artıb.

2022-ci ilin ilk 5 ayında ixrac 20,4 faiz artaraq 102,5 milyard dollar, idxal 41 faiz artaraq 145,74 milyard dollar olub.

İlk 5 ayda xarici ticarət kəsiri 43,23 milyard dollar olmaqla, 36 faiz artım göstərib.

Qeyd edək ki, Türkiyə hökuməti lirənin ucuzlaşmasına şərait yaratmaqla ixracı daha çox artırmaq və bunun hesabına ticarət kəsirini azaltmaq istəyirdi. Amma nəticələr göstərir ki, ucuz lirə idxalı daha çox artırır və buna görə də kəsir nəinki azalmır, əksinə bir qədər də artır. Bu vəziyyət lirənin gələcəkdə də ucuzlaşacağına dair ehtimalları gücləndirir.

Vasif

Sfera.az