Müharibə Ukrayna iqtisadiyyatını dağıdır: Milyardlarla dollarlıq zərər...

Sfera.az bildirir ki, müharibə başlayana qədər də Ukrayna iqtisadiyyatı yaranmış vəziyyətə görə zərərlə üzləşirdi. Prezident aparatının rəhbərinin müavini Rostislav Şurma ölkə ətrafında hərbi-siyasi vəziyyətin gərginləşməsinin iqtisadiyyata hər ay 2-3 milyard dollar zərər vurduğunu söyləmişdi. Bunlar dayandırılmış investisiyalar və əlavə inflyasiya, turizm sektorunda itkilər, hava səyahətlərinin azalması şəklində özünü göstərirdi.   

Həmçinin spekulyativ təzyiqlər var idi. Spekulyativ təzyiqlər məzənnəyə təzyiqi artırır və bu qeyd edilən itkidən başqa iqtisadiyyat daha 1,5-2 milyard dollar itirdi. Müharibəyə qədər ümumi itki aylıq 4-5 milyard dollar və ya günlük 150-200 milyon dollar təşkil edirdi. 

Artıq müharibə də baş verib. Müharibə bütün ölkə ərazisinə yayıldığından, o, iqtisadiyyatı iflic edir, dövlət və şəxsi əmlaka maddi zərər dəyir, ölkədən maliyyə aktivlərinin çıxışı baş verir. Bunlardan başqa ölkə hər gün çoxlu sayda hərbi texnika və silah-sursatdan istifadə edir, onların bir çoxu məhv olduğundan yeni hərbi texnikaya, dolayısı ilə əlavə vəsaitə ehtiyac yaranır.  

Genişmiqyaslı müharibə iş yerlərinin bağlanmasına, əhalinin pul və başqa gəlirlərinin azalmasına, nəticədə isə iqtisadiyyatda istehsal göstəricilərinin pisləşməsinə səbəb olur.  

 

2021-ci ildə Ukraynada 181 milyard dollarlıq məhsul istehsal olunub. İstehsal göstəricilərinin 2022-ci ilin sonunda azalacağı dəqiqdir. Əgər müharibə uzanarsa və nəticədə daha böyük dağıntı olarsa, zərər 100 milyard dolları ötəcək.  

2014-2015-ci il müharibəsi zamanı Ukrayna yalnız hərbi və digər bu məqsədlə həyata keçirilən tədbirlərə görə 52 milyard dollar xərcləmişdi.  

2022-ci ildə xərclərin daha böyük olacağı heç kimdə şübhə doğurmur.