İdxal edilən mallardan alınan rüsum artırılıb
İqtisadiyyat
13:18 / 01.02.2022
597
Ötən il Azərbaycana idxal edilən mallardan orta hesabla 6,05 faiz dərəcəsi ilə gömrük rüsumu alınıb. Bu dərəcə 2020-ci ildə alınan rüsumun dərəcəsindən 0,5 faiz bəndi yüksəkdir.
Sfera.az bildirir ki, orta faiz dərəcəsi gömrük rüsumu üzrə daxil olan məbləğin idxalın dəyərinə nisbəti əsasında müəyyənləşir.
Xatırladaq ki, ötən il toplanan rüsum 1,205 milyard manat, idxalın dəyəri 19,9 milyard manat olub.
Azərbaycana idxal edilən mallardan 4 müxtəlif tarif dərəcəsi ilə rüsum alınır.
Dövlət Gömrük Komitəsinin 2020-ci ilə aid olan məlumatına görə tariflər sıfır, 5 faiz, 15 faiz və spesifik olmaqla hesablanır.
2020-ci ildə 4 887 mal növü üzrə 15 faizlə, 2 054 mal üzrə 5 faizlə, 2 994 mal üzrə sıfır faizlə idxal rüsumu alınıb. Daha 426 mal üzrə spesifik şəkildə idxal rüsumu hesablanıb. Ümumilikdə 10 361 mal üzrə hesablanan ortaçəkili tarif dərəcəsi 8,08% təşkil edib.
2020-ci ildə idxalın həcmi və toplanan gömrük rüsumu nəzərə alındıqda isə alınan orta tarif dərəcəsi 5,55 faiz olub. Bu tarixdə idxalın həcmi 18,242 milyard manat, toplanan rüsum 1,013 milyard manat təşkil edib.
Məlumata görə, 2020-ci ildə sıfır dərəcə ilə 2,382 milyard dollar dəyərində (cəmi idxalın 22,25 faizi) mal idxal olunub.
Vasif
Sfera.az
