Azərbaycanda bir ildə 200-dən çox sənaye müəssisəsi açılıb
İqtisadiyyat
14:33 / 13.08.2021
794
Azərbaycanda ötən il sənaye müəssisələrinin sayı 220 ədəd və ya 7 faiz artaraq 3389 ədəd olub.
Sfera.az rəsmi məlumatlara istinadən xəbər verir ki, ölkəmizdə olan sənaye müəssisələrinin əksəriyyəti emal sektorunda fəaliyyət göstərir. Burada 2515 müəssisə var və onların sayı bir ildə 185 ədəd, yəni 7,94 faiz artıb.
Emal sənayesində ən çox müəssisə qida məhsullarının istehsalı üzrə fəaliyyət göstərir. Onların sayı 487 ədəddir və son bir ildə 38 ədəd artıb.
Tikinti materiallarının istehsalı, maşın və avadanlıqların quraşdırılması, poliqrafiya fəaliyyəti, rezin və plastik kütlə məmulatlarının istehsalı, mebel istehsalı, elektrik enerjisi, qaz və buxar istehsalı, bölüşdürülməsi və təchizatı, su təchizatı, tullantıların təmizlənməsi və emalı müəssisələrinin də sayı çoxdur.
Emal sektorunda ən az müəssisə neft məhsullarının istehsalı (9 ədəd), tütün məmulatlarının istehsalı (13 ədəd), avtomobil istehsalı (13 ədəd), əczaçılıq məhsullarının istehsalı (17 ədəd) sahələrindədir.
İqtisadiyyatımızda ən çox məhsul istehsal olunan mədənçıxarma sənayesində isə cəmi 337 müəssisə var. Burada müəssisələrin sayı 6 ədəd artıb. Bu müəssisələrin 32-si neft və qaz hasilatı ilə məşğuldur. Metal hasilatı ilə 8 müəssisə, daş, qum, çınqıl, duz və digər mədənçıxarma sənayesi hasilatı məhsullarının istehsalı ilə 164 müəssisə məşğul olur.
Vasif
Sfera.az
