Neftin qiyməti 70 dolları keçəcək - PROQNOZ
Sfera.az xəbər verir ki, bu barədə Beynəlxalq Energetika Agentliyinin (BEA) "World Energy Outlook 2020” hesabatında yer alıb.
BEA-nın proqnozuna görə baza ssenaridə 2025-ci ilədək neftin dəyəri bir barel üçün 71 dollara, 2030-cu ilədək 76 dollara və 2040-cı ilədək 85 dollara qədər yüksələ bilər.
Agentlik uzunmüddətli proqnozda pandemiyadan sonra enerji bazarlarının inkişafı üçün bir neçə ssenarini nəzərdən keçirib. 2021-ci ildə tədricən koronavirus pandemiyası üzərində nəzarətin ələ keçirilə biləcəyi düşünülür. Bu vəziyyətdə qlobal iqtisadiyyat elə 2021-ci ilin sonuna qədər böhrandan əvvəlki səviyyələrə qayıdacaq.
2021-ci ildə koronavirusa qalib gəlmək mümkün olmasa, iqtisadiyyatın bərpası gecikəcək. Belə halda neftin qiyməti bir qədər zəif artaraq 2025-ci ilədək 59 dollar/barelə, 2040-cı ilədək isə 72 dollar/barelə çata biləcək.
Paris sazişinin iqlim hədəfləri ilə bağlı daha radikal ssenaridə isə neftin qiyməti qarşıdakı 20 ildə 55 dollara belə çata bilməyəcək. Belə ki, bu ssenaridə neftin qiymətini n 2025-ci ilədək 57 dollar/barel, 2040-cı ilədək isə 53 dollar/barelə bərabər olacağı proqnozlaşdırılır.
BEA qeyd edir ki, investisiyaları stimullaşdırmaq üçün qarşıdakı 5 ildə neftin qiymətinin 70 dollar/barelə yüksəlməsi lazımdır. Bundan sonra qiymətlər bir barel üçün 75-85 ABŞ dolları aralığında sabitləşə bilər.
