Bu gün Ağdamın "Qarabağ” klubu Çempionlar Liqasının qrup mərhələsi çərçivəsində ilk ev oyununu keçirib.

 

 Bu matç həmçinin Azərbaycan futbolu tarixinə ən çox izlənilən oyun kimi düşüb. Bakı Olimpiya stadionunda oyunu 67 min 500 azarkeş canlı izləyib. Oyun günü Bakı Olimpiya Stadionunun ərazisinə şəxsi nəqliyyat vasitələrinin, eləcə də minik avtomobillərinin girişi tam olaraq məhdudlaşdırılıb. Azarkeşləri stadiona daşınması isə Bakı Nəqliyyat Agentliyi tərəfindən həyata keçirilib.

Bəzi Kütləvi İnformasiya Vasitələrində bildirilib aki, qarşılaşmadan sonra minlərlə azarkeş yağışın altında metroya qədər piyada getməli olub. Bu barədə görüntülər də yayımlanıb.

Deyilənlərə aydınlıq gətirmək üçün Bakı Nəqliyyat Agentliyilə əlaqə saxladıq. Qurumun İctimai əlaqələr və maarifləndirmə şöbəsinin müdiri Mais Ağayev "Ölkə.Az”a bildirdi ki, verilən informasiya kökündən səhvdir. Onun sözlərinə görə, Bakı Olimpiya Stadionunun ictimai nəqliyyat terminalında ən son tamaşaçı ərazini tərk edənə qədər avtobuslar fəaliyyət göstərib.

"İstər əvvəlki kimi müəyyənləşdirilən "Gənclik” stansiyası, yəni X2 Express xətti, istərsə də, digər istiqamət, metronun "Qara Qarayev” stansiyası, yəni X1 Express xətti üzrə tamaşaçıların daşınmasında heç bir problem olmayıb. Düzdür tamaşaçıların stadiona gəlişi zamanı müəyyən çətinliklər yaşanıb. Bu da yollardakı tıxacla əlaqəli olub. Nə avtobusların sayında, nə də tamaşaçıların daşınmasında problem yaşanmayıb. Hava şəraitilə əlaqədar müəyyən çətinliklər vardı. Lakin görülən operativ tədbirlər nəticəsində bu çətinliklər də aradan qaldırılıb”, - deyə M. Ağayev bildirib. 

Çəkilən videoya gəlincə, M. Ağayev deyir ki, bu görüntülər "Koroğlu” stansiyasının çıxışına yaxın, nəqliyyat mübadilə məntəqəsinin ərazisində çəkilib: "X2 Express və X1 Express avtobusları Bakı Olimpiya Stadionunun ictimai nəqliyyat terminalında fəaliyyət göstərirdi. Sərnişinlər özləri yanlış istiqamətdə gediblər. Bu zaman da, onlar həmin avtobusları görməyiblər. Bu da səhv rəylər yaradıb”.