“Sabah” – “Slaviya” matçı: Bukmeykerlər kimi qalib görür?
Bu gün UEFA Çempionlar Liqasının liqa mərhələsində Azərbaycanın “Sabah” klubu Çexiyanın “Slaviya” komandası ilə qarşılaşacaq. Oyundan əvvəl müxtəlif proqnoz platformalarında mümkün nəticələr qiymətləndirilib.
Sfera.az xəbər verir ki, proqnozlara əsasən, “Slaviya” qarşılaşmada qalib gəlmək ehtimalı daha yüksək olan komanda kimi göstərilsə də, “Sabah”ın da qələbəsi və heç-heçə ehtimalı da nəzərdən keçirilir.
“Betimate” platformasının statistik modelində “Slaviya”nın qələbə ehtimalı 51 faiz, “Sabah”ın qələbə ehtimalı 27 faiz, heç-heçə ehtimalı isə 22 faiz göstərilib. Platforma mümkün hesab variantlarından biri kimi 2:1 nəticəsini irəli sürüb.
“Rondo Research” platformasının hesablamalarında isə “Slaviya”nın qələbə ehtimalı 46 faiz, “Sabah”ın qələbə ehtimalı 32 faiz, heç-heçə ehtimalı 22 faiz qiymətləndirilib. Bu modeldə 1:1 hesabı mümkün nəticələrdən biri kimi göstərilib.
“Slaviya”nın üstün tərəflərindən biri son oyunlardakı nəticələridir. Çexiya təmsilçisi qarşılaşmaya ardıcıl dörd qələbə ilə gəlir. Komanda ilk turda Fransanın “Lans” klubuna 2:3 hesabı ilə uduzsa da, həmin görüşdə iki qol vurulması onun hücum imkanlarını göstərən amillərdən biri kimi qiymətləndirilə bilər. “Slaviya”nın hücumda fəal olması və yaratdığı imkanlardan yararlanması “Sabah” üçün əsas çətinliklərdən ola bilər.
Bununla belə “Sabah”ın doğma meydanda oynaması və azarkeş dəstəyi komandanın üstünlükləri sırasındadır. Qiymətləndirmələrə görə, “Sabah”ın qarşılaşmada daha intizamlı müdafiə olunması, rəqibin hücumlarının qarşısını alması və əks-hücumlarda yaranan fürsətlərdən istifadə etməsi qələbə şansını artıra bilər.
Komandanın hücum xəttində Veljko Simiç və Joy-Lens Mikelsin çıxışı da diqqət çəkən məqamlardandır. Oyunda bu futbolçuların yaratdığı imkanlardan səmərəli istifadə etməsi “Sabah”ın qol vurmasına kömək edə bilər. Bununla belə, komandanın qələbəsi yalnız hücumçuların fərdi çıxışından deyil, müdafiə və yarımmüdafiə xətlərinin birgə fəaliyyətindən də asılı olacaq.
Qeyd edək ki, komandalar turnirin ilk qarşılaşmasında məğlub olub. “Sabah” “Mançester Yunayted”ə 0:4, “Slaviya” isə “Lans”a 2:3 hesabı ilə uduzub. Bu səbəbdən Bakıdakı görüş hər iki komanda üçün turnirdə ilk xalları qazanmaq baxımından əhəmiyyət daşıyır.
İradə Elsevər
