Futbolçuların xanımları: onlar milyonlar qazanır
Futbol dünyasının ən böyük ulduzları təkcə meydanda deyil, meydandan kənarda da diqqət mərkəzindədir. Son illər məşhur futbolçuların həyat yoldaşları və sevgililəri sosial şəbəkələrin gücü sayəsində özləri də qlobal məşhurlara çevrilərək milyonlarla dollar qazanırlar.
Sfera.az bildirir ki, mütəxəssislərin fikrincə, bu gün bəzi futbolçu xanımları reklam müqavilələri, brend əməkdaşlıqları və şəxsi biznes layihələri hesabına bir çox top model və məşhur influenserdən daha çox gəlir əldə edirlər.
Los-Ancelesdə fəaliyyət göstərən "The Digital Dept" agentliyinin rəhbəri Lindsi Kuk bildirir ki, sosial media WAG fenomenini tamamilə yeni səviyyəyə qaldırıb:
“Əvvəllər yalnız çox məşhur şəxslər geniş auditoriya toplaya bilirdi. İndi isə məşhur futbolçu ilə münasibətdə olan və sosial şəbəkələrdə aktiv görünən hər bir qadın qısa müddətdə milyonlarla izləyici qazana bilir. Bu auditoriya sonradan böyük reklam gəlirlərinə çevrilir”.
İdman marketinqi üzrə ekspert Kim Zioti futbolçu xanımlarını iki qrupa ayırır. Birinci qrupa futbolçularla münasibətlərindən əvvəl də tanınan müğənnilər, aktrisalar və modellər daxildir.
Məsələn, Argentina millisinin futbolçusu Rodriqo De Paulun sevgilisi olan müğənni və aktrisa Tini Stoessel artıq milyonlarla izləyicisi olan pop ulduzdur. O, "Under Armour", "Pantene" və "Adidas" kimi nəhəng brendlərlə əməkdaşlıq edir.
Eyni kateqoriyaya fransalı futbolçu Kilian Mbappe ilə əlaqələndirilən ispan aktrisa Ester Ekspozito və belçikalı qapıçı Tibo Kurtuanın həyat yoldaşı, model Mişel Gerziq də daxildir.
Ən diqqətçəkən uğur hekayələrindən biri isə Corcina Rodriqesə məxsusdur. O, 2017-ci ildə Madriddə mağazada satıcı işləyərkən Kriştianu Ronaldo ilə tanış olub. Hazırda onun sosial şəbəkələrdə on milyonlarla izləyicisi var və müxtəlif mənbələrin hesablamalarına görə sərvəti milyonlarla dollarla ölçülür.
Corcina Rodriqes "Chopard", "L'Oréal", "Charlotte Tilbury" və digər məşhur markalarla əməkdaşlıq edir. Bundan əlavə, onun öz realiti şousu, moda layihələri və biznes təşəbbüsləri mövcuddur. Antonela Rokkutso da bu sahənin ən uğurlu simalarından biri hesab olunur. Dünya çempionu Lionel Messinin həyat yoldaşı olan Antonela ailə həyatı, idman fəaliyyəti və gündəlik yaşamını sosial şəbəkələrdə paylaşaraq böyük auditoriya formalaşdırıb.
Onun "Adidas", "Alo Yoga", "Louis Vuitton" və digər beynəlxalq markalarla əməkdaşlıqları olduğu bildirilir. Ekspertlərin fikrincə, bu tərəfdaşlıqlar ona milyonlarla dollar qazandırır. Mütəxəssislər hesab edir ki, insanların bu qadınlara marağının əsas səbəbi məşhurların gündəlik həyatını görmək istəyidir.
İzləyicilər onların hansı ölkələrə səyahət etdiyini, hansı brendlərdən istifadə etdiyini, uşaqlarını necə böyütdüyünü və futbol ulduzlarının şəxsi həyatını yaxından izləməyə çalışırlar. Bu səbəbdən bəzi WAG-ların sosial media aktivliyi hətta həyat yoldaşlarından daha çox diqqət çəkir.
Marketinq mütəxəssislərinin qiymətləndirmələrinə görə, orta səviyyəli futbolçu xanımları və sevgililəri reklam xarakterli bir paylaşım üçün 5-25 min dollar qazana bilirlər. Lakin Corcina Rodriqes və Antonela Rokkutso kimi qlobal ulduzlara gəldikdə qiymətlər kəskin artır. Ekspertlər bildirirlər ki, onlar bir sponsorlu paylaşım üçün 100 min dollardan çox qonorar tələb edə bilirlər. Uzunmüddətli reklam müqavilələri və brend səfirliyi layihələri isə onlara hər il milyonlarla dollar gəlir gətirir.
Beləliklə, müasir futbol dünyasında təkcə futbolçular deyil, onların həyat yoldaşları və sevgililəri də böyük biznes imperiyaları quraraq qlobal reklam bazarının ən gəlirli simalarından birinə çevriliblər.
Firuzə Əliyeva