Karlsen yarışa cins şalvarla çıxdı, qaydalar dəyişdirildi - FOTOLAR

Dünyanın ən yaxşı şahmatçısı kimi tanınan Maqnus Karlsen Beynəlxalq Şahmat Federasiyasının (FİDE) rəsmi geyim qaydalarını yumşaltdıqdan sonra böyük turnirlərə qayıdacağını açıqlayıb. 

Sfera.az bildirir ki, şahmat üzrə dünya çempionu, 34 yaşlı norveçli şahmatçı Maqnus Karlsen Nyu-Yorkda keçirilən sürətli və blits şahmat üzrə dünya çempionatı turnirinə cins şalvarla gəlib. Mövcud çempion statusuna baxmayaraq, onun cins şalvarda oynamağa davam etməsinə qadağa qoyulub. Qeyd edək ki, Beynəlxalq Şahmat Federasiyasının geyim kodu yalnız qara şalvar tələb edən işgüzar üslubdadır.

Həftə sonu FİDE rəhbərliyi iştirakçıların zahiri görünüşü ilə bağlı ciddi tələblərə yenidən baxmağa hazır olduğunu açıqlayıb. Təşkilat müəyyən edilmiş qaydalardan "xırda və zərif" kənara çıxmalara yol verib, Karlsenin yarışı davam etdirməsinə şərait yaradıb. Şahmatçı əmin edib ki, bazar ertəsi də oyuna cins şalvarda çıxacaq.

Karlsen ilk dəfə olaraq bənövşəyi köynək, cins şalvar və pencəkdə görünərək geyim kodunu pozub. Buna görə o, 200 dollar cərimə olunub. Qrossmeyster özü izah edib ki, oyundan bir müddət əvvəl nahar zamanı şəxsi görüşdə olub və paltar dəyişdirməyi lazım bilməyib.

Təşkilatçılar ona turnirin ciddi tələblərini xatırladana qədər şahmatçı bu geyimdə bir neçə oyun keçirməyi bacarıb. 

Karlsen ertəsi gün cins şalvarını dəyişməyi təklif etsə də, ona dərhal dəyişməsi əmr edilib.

O, turniri tərk edəcəyini bildirib:

"Heç kim güzəştə getmək istəməsə... Hava daha gözəl olan yerə gedəcəyəm".

Bununla belə, bazar günü vəziyyət dəyişib, çünki FİDE rəsmiləri geyim kodunu yumşaldaraq, oyunçulara pencəklə birləşdirilən uyğun cins şalvar geyinməyə icazə veriblər. Federasiya prezidenti Arkadi Dvorkoviç turnir heyətinin geyimlərin yenilənmiş qaydalara uyğun olmasına nəzarət edəcəyini bildirib. O, oyunçuların yeni güzəştlərdən sui-istifadə etməyəcəklərinə ümid etdiyini də əlavə edib. 

Bundan sonra Karlsen sosial şəbəkələrdə turnirə qayıdacağını açıqlayıb.