Bakıda kiberidman üzrə böyük çempionat keçiriləcək
Bakıda video oyunlar, kospley və K-pop rəqsləri festivalı keçiriləcək.
Sfera.az bildirir ki, tədbir dekabrın 8-də Bakı İdman Sarayında baş tutacaq. Artıq “Gamesummit” komandası GMT kiberidman təşkilatı ilə birlikdə qarşıdan gələn “2024 Gamesummit Winter” Beynəlxalq Oyun Festivalı üçün bir neçə kiberidman çempionatı elan edib.
Oyunlar qlobal və yerli oyunçular arasında populyarlığına görə seçilib. Çempionatlar “Fortnite”, “EA FC25”, “PUBG Mobile”, “Mortal Kombat 1”, “Tekken 8” oyunları üzrə keçiriləcək.
Həmçinin festival ziyarətçiləri matçların şousunu izləyəcək – “Counter Strike 2” və “Valorant”da qələbə uğrunda ölkənin aparıcı universitetlərini təmsil edən komandalar əsas səhnədə mübarizə aparacaqlar. Oyunçular üçün xüsusi formalar vasitəsilə və ya birbaşa tədbirdə qeydiyyatdan keçmək mümkün olacaq.
Qeyd edək ki, “Gamesummit Winter 2024” artıq Azərbaycanda keçirilən dördüncü tədbirdir və region üçün əhəmiyyət kəsb edir. Festival video oyun və müasir əyləncə həvəskarlarının ünsiyyəti və birləşməsi üçün bir platforma yaradır və oyun yaradıcıları öz istedadlarını nümayiş etdirə, peşəkarlar və oyunçularla əlaqə qura bilərlər.
Günay
