“Ən böyük günah baş məşqçidədir”.

Bunu Sfera.az-a açıqlamasında futbol mütəxəssisi, keçmiş futbolçu Ceyhun Sultanov milli komandanı n İsveçə 0:5 hesablı məğlubiyyətinə münasibət bildirərkən deyib.

Müsahibimiz fikirlərini bu cür davam etdirib:

““0:5”-ə şərh də vermək, “yaxşı oynadıq, amma uduzduq”, demək də olmur. Bu hesabın şərhi yoxdur. Buna cavabdeh olan şəxslər var və onlar reaksiya verməlidirlər. Bir adam ki, sağ cinahda Höccət Haqverdiyevi çıxarıb Cəlal Hüseynovu qoyursa, bundan sonra məşqçi ilə bağlı nə şərh verə bilərəm?

Canni De Byazi ola bilər ki, AFFA-nı aldatmaq, inandırmaq üçün oyunla bağlı müsbət çıxış edib, amma bunu orada deyə bilərdi – bəlkə, orada heç futbol adamları yoxdur. Futbolu bilsəydilər, De Byazi baş məşqçi olmamalı idi”.

C.Sultanov həmçinin, baş məşqçinin istefa etməsi ehtimalından da söz açıb:

“İstefa nəticə olmayanda verilir, De Byazi imzaladığı müqaviləni pozsa, pul ala bilməyəcək. Hara gedir? Əslində Azərbaycana qayıdandan sonra AFFA rəhbərliyi yığılıb onu yola salmalı idi. Biz bundan xeyir görməyəcəyik. 5 oyundur, o və onun ətrafında olanlar bütün xalqı aldatdı ki, Azərbaycan komandasında irəliləyiş var. Əfsuslar olsun!

Birinci yerə sahib olmaq bizim üçün bilirsiniz nədir? – Cənnətə gedən yol...

Milli komandanın qazanmağa potensialı var? Yoxdur!  De Byazi AFFA-da oturan insanları çox gözəl aldada bilib. Təəssüf ki, bu gün AFFA-da oturan insanlar indi “De Byazi ilə əl-ələ verib futbolu inkişaf etdirməliyik”, deyirlər, amma Qurban Qurbanovla əl-ələ verəndə nədənsə onun əlində xəstəlik varmış və  onlara keçəcəkmiş kimi davranırdılar”.

Nuh Tarverdiyev