Heydər Əliyevin abidəsi 2010-cu ildə Həştərxan şəhərində, Volqa çayının sahilində, onun adını daşıyan parkda açılıb.

"Bu gün biz Azərbaycanın ümummilli lideri, görkəmli dövlət və siyasi xadim Heydər Əliyevin xatirəsini ehtiramla yad edirik. Rusiya ilə Azərbaycan arasında tərəfdaşlığın əsasını qoyan məhz o olub", - deyə Mixail Boqomolov bildirib.

Boqomolov həmçinin qeyd edib ki, SSRİ hökuməti sədrinin birinci müavini olduğu zaman Heydər Əliyev Azərbaycanla Həştərxan vilayəti arasında bir çox sahələrdə əməkdaşlığın təməlini qoyub, onun təşəbbüsü ilə Həştərxan tərsanələrində Azərbaycan neftçiləri üçün sifarişlər yerləşdirilib.

"Bu gün Azərbaycanla mehriban qonşuluq, tərəfdaşlıq münasibətlərimiz inkişaf edir. Hər zaman xatırlayırıq ki, Rusiya ilə Azərbaycan arasındakı dostluğun başlanğıcını məhz müdrik və uzaqgörən siyasətçi Heydər Əliyev qoyub”, - deyə Mixail Boqomolov vurğulayıb.

11 nömrəli Həştərxan orta məktəbinin direktoru Tatyana Tixomirova isə öz çıxışında rəhbərlik etdiyi təhsil ocağının yenidən qurulmasına görə Heydər Əliyev Fonduna təşəkkürünü bildirib. O bildirib ki, 10 il əvvəl məhz Heydər Əliyev fondunun təşəbbüsü ilə sözügedən məktəbin yenidən qurulması işlərinə başlanılmışdı.

"2011-ci ilin dekabr ayında təmir olunmuş binaya daxil olduq və məktəbin Azərbaycan xalqının görkəmli oğlu Heydər Əliyevin adını daşımasından qürur duyuruq. Bütün beynəlxalq layihələrdə Azərbaycanla birgə iştirak edirik. Təəssüf ki, son bir ildə bütün layihələr yalnız onlayn qaydada həyata keçirilir. Ümid edirik ki, pandemiya bitəndən sonra dost dövlətlərin nümayəndələri ilə əyani təmasımız bərpa olunacaq", - deyə məktəb direktoru bildirib.

Mənbə: Həştərxan vilayətinin beynəlxalq əlaqələr Agentliyi