Bu cihazlar yol qəzalarının qarşısının alınmasına kömək edir
Sürücülərin və vəhşi təbiətin təhlükəsizliyini təmin etmək məqsədilə yol kənarlarında ağıllı cihazlar istifadəyə verilib. “Virtual çəpərlər” adlanan bu sistem yaxınlaşan nəqliyyat vasitələrinin faralarını aşkar edərək avtomatik şəkildə aktivləşir və heyvanların yol hərəkətinə çıxmasının qarşısını almağı hədəfləyir.
Sfera.az xəbər verir ki, sistem işə düşdükdə yanıb-sönən mavi və sarı LED işıqlar, eləcə də səs siqnalları yayılır. Bu siqnallar vəhşi heyvanları yol kənarından uzaqlaşdıraraq onların avtomobillərlə toqquşma riskini azaldır.
Avstraliyanın müxtəlif bölgələrində aparılan sınaqlar texnologiyanın effektivliyini ortaya qoyub. Viktoriyanın Sörf Sahili bölgəsində makropodların (kenquruya bənzər heyvanlar) iştirakı ilə baş verən toqquşmaların təxminən 50 faiz azaldığı bildirilir. Eurobodalla bölgəsində isə kenquru ölümlərində 90 faizə qədər azalma qeydə alınıb.
Müsbət nəticələrdən sonra Queanbeyan–Palerang Regional Şurası da yüksək riskli hesab edilən Macs Reef Road kimi ərazilərdə 12 aylıq pilot layihənin tətbiqinə qərar verib.
Mütəxəssislər bu təşəbbüsün yalnız vəhşi təbiətin qorunmasına deyil, həm də sürücülərin təhlükəsizliyinə mühüm töhfə verdiyini bildirirlər. NRMA Sığorta şirkətinin icraçı direktoru Devid Uilks də heyvanların yola çıxmasının qarşısını alan hər bir tədbirin vacibliyini vurğulayıb.
Kanberrada minlərlə insanın imzaladığı müraciətlərlə dəstəklənən bu sistemin yaxın gələcəkdə daha geniş ərazilərdə tətbiq olunacağı gözlənilir.
Mənsumə