ABŞ-nin şərq sahilini vuran güclü fırtınalar Nyu-York və ətraf ərazilərdə həyatı iflic edib. Şəhərdə metrolar, küçələr və nəqliyyat infrastrukturu su altında qalıb. Nyu-York və Nyu-Cersi ştatlarında fövqəladə vəziyyət elan olunub.

Sferaz xarici mediaya istinadən xəbər verir ki, cümə axşamı günorta saatlarında başlayan leysan yağışları və qəfil daşqınlar Nyu-Yorkda metro stansiyalarının və yolların su ilə dolmasına səbəb olub.

“Grand Central” da daxil olmaqla, bir çox stansiyada hərəkət dayanıb, bəzi avtobuslar isə istifadəyə yararsız hala düşüb.

Elektrik kəsintilərindən sonra yaranan daşqınlar metro və avtobus xətlərində hərəkəti tam iflic edib. Lonq İzland və Nyu-Cersiyə işləyən elektrik qatarlarının axşam reysləri ləğv olunub. Nyu-York, Nyu-Cersi, Vaşinqton və Filadelfiyada hava limanlarında uçuşlar təxirə salınıb.

Nyu-York ştatının qubernatoru Keti Hoçul fövqəladə hal elan edərək sakinləri evdə qalmağa və hava xəbərdarlıqlarını diqqətlə izləməyə çağırıb:

“Axşam saatlarında güclü yağış və sel təhlükəsi gözlənilir. İşəgötürənlər əməkdaşlarını tez buraxsınlar”.

Nyu-Cersi ştatının qubernator müavini Taheşa Vey isə güclü külək və ildırımla müşayiət olunan leysan yağışları barədə xəbərdarlıq edib:

“Bu gün günorta saatlarından etibarən təhlükəli hava şəraiti gözlənilir. Sakinlər ehtiyatlı olmalı və rəsmi məlumatları izləməlidir”.

Bəsti Rəfizadə
Sfera.az

Nyu-York su altında qaldı - Fövqəladə vəziyyət elan olundu - FOTO