Meşələr yanır -Məsuliyyət kimindir?

İyul ayının ortalarından etibarən Azərbaycanın bəzi rayonlarında meşə yanğınları qeydə alınıb. Bənzər vəziyyət yüksək temperaturun müşahidə olunduğu Türkiyə, Yunanıstan, Albaniya və digər Aralıq dənizi ölkələrində də yaşanır. Mütəxəssislər bildirirlər ki, artan temperatur, quraqlıq və insan amili bu yanğınların əsas səbəbləridir.

Yay aylarında meşə yanğınlarının intensivləşməsi qlobal iqlim dəyişikliyi, ekoloji balansın pozulması və insanların ehtiyatsız davranışları ilə birbaşa əlaqələndirilir.

Mövzu ilə bağlı Sfera.az-a açıqlama verən təhlükəsizlik məsələləri üzrə ekspert Elmar Nurəliyev bildirib ki, yanğınların başlıca səbəbi insanların məsuliyyətsiz davranışlarıdır:

“İstər turistlər, istərsə də ərazi sakinləri meşəlik ərazilərdə olduqları zaman yanğın təhlükəsizliyi qaydalarına ciddi riayət etməlidirlər. Təəssüf ki, bəzən açıq od qalayan şəxslər alovu tam söndürmədən ərazini tərk edir, siqaret kötüyünü yerə atırlar və bu da faciəvi nəticələrə səbəb olur. Digər ciddi məsələ isə zibillənmədir. Günəş şüalarının təsiri ilə atılmış şüşə butulkalar linza effekti yaradaraq ot örtüyünün alışmasına yol aça bilər".

Ekspert hesab edir ki, bu kimi halların qarşısını almaq üçün həm dövlət qurumları, həm də vətəndaşlar üzərlərinə düşən məsuliyyəti dərk etməlidirlər. Onun sözlərinə görə, profilaktik tədbirlər gücləndirilməli, maarifləndirmə işləri intensiv aparılmalıdır:

“Əhali maarifləndirilməli, meşəlik ərazilərdə xəbərdaredici lövhələrin sayı artırılmalı, nəzarət tədbirləri gücləndirilməlidir. Eyni zamanda, meşə təsərrüfatı və fövqəladə hallar qurumları birgə və operativ şəkildə fəaliyyət göstərməlidir".

Elmar Nurəliyev meşə yanğınlarının qarşısının alınmasında ictimai nəzarətin də mühüm rol oynadığını vurğulayıb. Onun fikrincə, hər bir vətəndaş ətraf mühitə qarşı məsuliyyətli yanaşmalı, şübhəli hallarla rastlaşdıqda dərhal aidiyyəti qurumlara məlumat verməlidir.

Qeyd edək ki, meşə yanğınları təkcə təbiətə deyil, həm də insan sağlamlığına, kənd təsərrüfatına və iqtisadiyyata ciddi ziyan vurur. Buna görə də hər kəsin bu məsələdə diqqətli və məsuliyyətli davranması olduqca vacibdir.

Firuzə Əliyeva

Sfera.az