“SpaceX”in raketi sınaq zamanı bomba kimi partladı - VİDEO

ABŞ-nin Texas ştatında “SpaceX” şirkətinin sınaqdan keçirdiyi “Starship” raketi gecə saatlarında güclü partlayışla məhv olub. Hadisə “SpaceX”in Texasın cənubunda yerləşən və “Starbase” adlandırılan buraxılış kompleksində baş verib.

Sfera.az “Sözcü”yə istinadən xəbər verir ki, şirkətin məlumatına görə, bu, “Starship” raketinin onuncu test uçuşuna hazırlıq mərhələsində qeydə alınıb və “əhəmiyyətli bir anormallik” nəticəsində partlayış baş verib.

 
Güclü partlayış nəticəsində göyə qalxan alov topu gecə səmanı işıqlandırıb, yaranan şok dalğası isə ətrafdakı avtomobilləri sarsıdıb.

“SpaceX” hadisədən sonra verdiyi açıqlamada bildirib ki, ərazidə təhlükəsizlik zonası yaradılıb və şirkət əməkdaşları arasında xəsarət alan yoxdur. Eyni zamanda, ətraf yaşayış məntəqələri üçün hər hansı təhlükənin olmadığı qeyd olunub.

Şirkət yerli sakinlərə test sahəsinə yaxınlaşmamağı tövsiyə edib. Hazırda “SpaceX” nümayəndələri və yerli rəsmilər hadisənin səbəblərini müəyyənləşdirmək üçün birgə araşdırma aparırlar.

Bəsti Rəfizadə
Sfera.az