Əhmədlidə bir ailə ilanın girovuna çevrildi - Rəsmi qurumlar kömək etmək istəmir

Bakının Əhmədli qəsəbəsində yaşayan bir ailə həyətlərinə girən ağ rəngli, təxminən 1 metr uzunluğundakı bir ilan səbəbindən evlərinə qapanıblar. 

Sfera.az xəbər verirki, bu barədə ailənin yaxınları məlumat verib. 

Ailə yaxınının bildirdiyinə görə, ilan avtomobilin altında gizləndiyindən, ailə üzvləri həyətə çıxmağa qorxur.

Ailə üzvlərinin bildirdiyinə görə, onlar dəfələrlə Fövqəladə Hallar Nazirliyinin 112 qaynar xəttinə müraciət etsələr də, telefonlarına “Xətti məşğul etməyin” cavabı verilib və kömək göstərilməyib. Ekologiya və Təbii Sərvətlər Nazirliyi isə vətəndaşlara bu məsələnin onların səlahiyyətinə aid olmadığını bildirib: “Biz ağaclara baxırıq, ilanlara yox”.

Ümidlərini rəsmi qurumlardan kəsən ailə, daha sonra özəl bir xidmətlə əlaqə saxlayıb. Xidmət müəssisəsindən bildirilib ki, ilanı tutmaq üçün 250 manat ödəniş edilməlidir. Bu məbləğin yüksək olduğunu deyən ailə üzvləri özəl xidmətdən imtina ediblər. 

Ərazinin aid olduğu bələdiyyə orqanları ilə də əlaqə saxlanılıb. Bələdiyyədən yalnız təskinlik verilib: “Qorxmayın, kömək etməyə çalışarıq”.

Xətai Rayon İcra Hakimiyyətindən isə məsələyə münasibət belə olub: “Bura icra hakimiyyətidir, ilanın bizə nə aidiyyatı var?”.

Bəsti Rəfizadə
Sfera.az