Qazaxıstanın Kənd Təsərrüfatı Nazirliyinin Balıqçılıq Komitəsi məlumat yayıb ki, Qazaxıstanın Mangistau vilayətinin Tupkaraqan rayonunda Xəzər dənizi sahilində 88 ölü suiti aşkarlanıb.

Suitilər aprelin 29-da sahilyanı monitorinq zamanı aşkar olunub. Qeyd olunur ki, heyvanların cəmdəkləri çürümə mərhələsindədir, bu isə ölüm səbəbinin müəyyənləşdirilməsini çətinləşdirir.

Mütəxəssislər hesab edir ki, miqrasiya edən suitilər qanunsuz balıq ovu məqsədilə qurulmuş torlara ilişərək boğulurlar. Suitilərin məhv olmasının digər səbəbi qida zəncirindəki dəyişikliklər, Xəzər dənizinin ekosisteminə yeni növlərin gətirilməsi, isti keçən qış, iqlim dəyişməsi səbəbindən təbii çoxalma dövrünün pozulması, müxtəlif xəstəliklər, o cümlədən suiti vəbası, balıq ovunda istifadə edilən qadağan olunmuş ov vasitələri və brokonyerlikdir.

Xəzərin dəyişən ekosistemi

Sfera.az “TASS” Agentliyinə istinadən xəbər verir ki, mövzu ilə bağlı Bizim.Media-ya danışan Elm və Təhsil Nazirliyinin Zoologiya İnstitutunun əməkdaşı Süleyman Süleymanov deyib ki, Xəzər dənizində suitilərin kütləvi şəkildə məhv olmasının bir neçə səbəbi var:

“Əsas Xəzər dənizində ekosistemin dəyişməsidir. Son illər Xəzər sürətlə çirklənir. Bu çirklənmə də dənizdəki faunanı məhv edir. Yəni təkcə suitilər deyil, Xəzərdəki digər canlılar da məhv olur.

Bilirsiniz ki, suitilər balıqlarla qidalanır. Son illər Xəzərdə balıqların azalması suitilər üçün qida problemi yaradıb. Ona görə suitilərin kütləvi şəkildə ölməsi həm də qida çatışmamazlığı ilə bağlıdır”.

İnstitutun əməkdaşı digər bir səbəbin suitilərin məcburən ovlanması olduğunu söyləyib:

“Son illər apardığımız müşahidələr göstərir ki, dəniz sahillərində aşkar edilən suiti leşlərinin üzərində zorakılıq əlamətləri var. Bu da onunla bağlıdır ki, ac suitlər balıqçıların torlarına hücum edir. Tora düşmüş balıqları yeyirlər. Belə vəziyyətdə isə özləri də tora düşürlər. Balıqçılarsa tora düşmüş suitiləri xilas yox, sadəcə məhv edirlər.

Son günlər Mahaçqala yaxınlığında qeydə alınan kütləvi məhv olmada balıqçı faktoru da ehtimal edilir. Çünki suitilər döl tökmək üçün şimala çayların deltasına kütəvi şəkildə axın edirlər.

Bu zaman gəmilərlə böyük ov edən balıqçıların toruna tuş gəlirər”.

Xəzərdəki suitilər ölür, yoxsa ÖLDÜRÜLÜR? – SENSASİON DETALLAR