Biləsuvarda ticarətçilər arasında dava QANLA NƏTİCƏLƏNDİ
Biləsuvar rayonunda ticarətçilər arasında yaranan mübahisə bıçaqlanma ilə nəticələnib. Hadisə rayonun mərkəzi ticarət məkanında baş verib.
Sfera.az xəbər verir ki, belə ki, aptek işlədən 45 yaşlı İkram Babayev təsərrüfat malları satışı ilə məşğul olan həmyerlisi, 2003-cü il təvəllüdlü Samir Abbaszadəyə bıçaqla xəsarət yetirib.
Tərəflər arasında əvvəlcə mübahisə yaranıb və bu zaman İkram Babayev Samiri onu telefondakı hansısa proqram vasitəsilə izləməkdə günahlandırıb.
Hadisə şahidlərinin sözlərinə görə, İkram Babayev onun başının kəsilməli olduğunu bildirib. Bundan sonra mübahisə daha da alovlanıb və Babayev qəfildən arxadan yaxınlaşaraq Abbaszadəyə bıçaqla xəsarət yetirib.
Yaralı dərhal Biləsuvar Rayon Mərkəzi Xəstəxanasına yerləşdirilib. Onun vəziyyəti barədə hələlik rəsmi açıqlama verilməyib. Ticarət mərkəzində işləyənlərin sözlərinə görə, hər iki şəxsin münasibətləri yaxşı olub.
DİN-in Mətbuat Xidmətinin Lənkəran regional qrupundan verilən məlumata görə, hadisəni törətməkdə şübhəli bilinən İkram Babayev saxlanılıb. Faktla bağlı araşdırma davam etdirilir.
